ग्राहकांच्या हक्कांच्या संरक्षणासाठी संघटनात्मक ताकद वाढणार; तुषार खैरनार तालुकाध्यक्ष, प्रतिश बागुल उपाध्यक्ष तर कपिल सोनवणे यांची संघटकपदी निवड
सटाणा प्रतिनिधी :
बागलाण तालुक्यातील ग्राहकांचे हक्क सुरक्षित ठेवणे, ग्राहकांची होणारी आर्थिक फसवणूक रोखणे आणि अन्यायाविरुद्ध संघटितपणे आवाज उठविण्याच्या उद्देशाने ग्राहक रक्षक बहुउद्देशीय समितीच्या वतीने बागलाण तालुका कार्यकारिणीची निवड करण्यात आली आहे.
या निवडीत तुषार खैरनार यांची बागलाण तालुका अध्यक्षपदी, प्रतिश बागुल यांची उपतालुका अध्यक्षपदी, तर कपिल सोनवणे यांची संघटकपदी निवड करण्यात आली. नवनियुक्त पदाधिकाऱ्यांवर ग्राहकांच्या समस्या सोडविणे, ग्राहकांना न्याय मिळवून देण्यासाठी प्रयत्न करणे, ग्राहक हक्कांविषयी जनजागृती करणे तसेच अन्यायकारक व्यवहारांविरोधात संघटितपणे लढा देण्याची जबाबदारी राहणार आहे.
सटाणा, ताहाराबाद, जायखेडा, नामपूर, मुल्हेर, अंतापूर, अलियाबाद, साल्हेर यांसह बागलाण तालुक्यातील विविध भागांमध्ये ग्राहकांच्या समस्या प्रभावीपणे मांडण्यासाठी समितीच्या माध्यमातून संघटनात्मक काम उभे राहण्याची अपेक्षा नागरिकांकडून व्यक्त होत आहे.
ग्राहकांचा आवाज बुलंद करण्याचे आव्हान
ग्राहकांची आर्थिक फसवणूक, चुकीची बिले, निकृष्ट दर्जाच्या वस्तूंची विक्री, जादा दर आकारणी आणि ग्राहक हक्कांशी संबंधित विविध प्रश्नांवर प्रभावीपणे काम करण्याचे आव्हान नवनियुक्त कार्यकारिणीसमोर असणार आहे. सर्वसामान्य ग्राहकांना त्यांच्या हक्कांची जाणीव करून देणे आणि अन्याय झाल्यास योग्य मार्गाने न्याय मिळवून देण्यासाठी मदत करणे, ही समितीची महत्त्वाची भूमिका ठरणार आहे.
नवनियुक्त पदाधिकाऱ्यांच्या निवडीबद्दल बागलाणवासीयांकडून अभिनंदन करण्यात येत असून त्यांच्या माध्यमातून सर्वसामान्य ग्राहकांच्या समस्या मार्गी लागतील, अशी अपेक्षा व्यक्त केली जात आहे. तसेच तिन्ही नवनियुक्त पदाधिकाऱ्यांना पुढील सामाजिक कार्यासाठी नागरिकांनी हार्दिक शुभेच्छा दिल्या आहेत.
