सासकल व धुमाळवाडी येथे ७११ अर्जांचे संकलन; ग्रामसभेची मान्यता मिळवून प्रमाणपत्र वितरण प्रक्रियेत महत्त्वपूर्ण योगदान
सासकल : प्रतिनिधी
महाराष्ट्र शासनाच्या कृषी विभागामार्फत राबविण्यात येत असलेल्या महिला शेतकरी सक्षमीकरण अधिनियम, २०२६ अंतर्गत महिला शेतकरी प्रमाणपत्र अर्ज संकलन, ग्रामसभेची मान्यता आणि प्रमाणपत्र वितरण प्रक्रियेत उत्कृष्ट कार्य केल्याबद्दल सासकल येथील कृषी सेवारत्न तथा सहाय्यक कृषी अधिकारी सचिन जाधव यांचा प्रशस्तीपत्र देऊन गौरव करण्यात आला. या कामगिरीत त्यांनी फलटण तालुक्यात प्रथम क्रमांक मिळविला आहे. तालुका कृषी अधिकारी फलटण दत्तात्रय गायकवाड यांच्या वतीने त्यांना हा सन्मान प्रदान करण्यात आला.
सचिन जाधव यांनी सासकल येथे ४१२, तर महाराष्ट्र राज्यातील पहिले ‘फळांचे गाव’ म्हणून ओळख असलेल्या धुमाळवाडी येथे २९९ असे एकूण ७११ महिला शेतकरी प्रमाणपत्र अर्ज संकलित केले. या अर्जांना २ ऑक्टोबर रोजी आयोजित ग्रामसभांमध्ये मान्यता मिळवून देत प्रमाणपत्र वितरणाची प्रक्रिया यशस्वीपणे राबविण्यात त्यांनी महत्त्वपूर्ण योगदान दिले.
महिला शेतकऱ्यांना शेती क्षेत्रातील अधिकृत ओळख मिळवून देणे, त्यांना विविध शासकीय कृषी योजनांचा लाभ घेण्यासाठी सक्षम करणे आणि महिला सक्षमीकरणाला चालना देणे हा या उपक्रमाचा मुख्य उद्देश आहे. या उद्देशपूर्तीसाठी सचिन जाधव यांनी केलेल्या उल्लेखनीय कार्याची कृषी विभागाने दखल घेत त्यांचा गौरव केला.
या यशाबद्दल सातारा जिल्हाधिकारी संतोष पाटील (IAS), जिल्हा अधीक्षक कृषी अधिकारी भाग्यश्री फरांदे, प्रकल्प संचालक आत्मा सातारा अजय शेंडे, उपविभागीय कृषी अधिकारी खलिद मोमीन, तालुका कृषी अधिकारी फलटण दत्तात्रय गायकवाड, मंडळ कृषी अधिकारी विडणी अजित सोनवलकर तसेच कृषी विभागातील अधिकारी-कर्मचारी आणि परिसरातील शेतकरी वर्गातून सचिन जाधव यांचे अभिनंदन होत आहे.
