१४ नोव्हेंबरपर्यंत रंगणार सांस्कृतिक आणि स्पर्धात्मक कार्यक्रम; रांगोळी, चित्रकला, पाककला, होम मिनिस्टरसह नाटकाचे आयोजन
दोडामार्ग :
भेडशी येथील श्री दामोदर दीपोत्सव समिती व ग्रामस्थ भेडशी यांच्या वतीने यंदाही दीपोत्सवानिमित्त विविध सांस्कृतिक, मनोरंजनात्मक आणि स्पर्धात्मक कार्यक्रमांचे आयोजन करण्यात आले आहे. रविवार, दि. ८ नोव्हेंबर ते शनिवार, दि. १४ नोव्हेंबर २०२६ या कालावधीत हा दीपोत्सव उत्साहात साजरा होणार असून, लहान मुलांपासून ज्येष्ठ नागरिकांपर्यंत सर्वांसाठी मनोरंजनाची पर्वणी उपलब्ध होणार आहे.
दरवर्षीप्रमाणे यंदाही नागरिकांसाठी विविध कार्यक्रमांची मेजवानी आयोजित करण्यात आली आहे. रविवार, ८ नोव्हेंबर रोजी रात्री ९ वाजता लॉटरी सोडतीने दीपोत्सवाच्या कार्यक्रमांना सुरुवात होईल. सोमवार, ९ नोव्हेंबर रोजी सायंकाळी ६ वाजता लहान व मोठ्या गटांसाठी रांगोळी स्पर्धा, तर मंगळवार, १० नोव्हेंबर रोजी सायंकाळी ७ वाजता चित्रकला स्पर्धा आयोजित करण्यात आली आहे.
बुधवार, ११ नोव्हेंबर रोजी सायंकाळी ६ वाजता पाककला स्पर्धा, रात्री ९ वाजता लहान व मोठ्या गटांसाठी फॅन्सी ड्रेस स्पर्धा आणि रात्री १० वाजता रेकॉर्ड डान्स स्पर्धा रंगणार आहे. गुरुवार, १२ नोव्हेंबर रोजी सायंकाळी ६ वाजता व्हेजिटेबल स्पर्धा, तर रात्री १० वाजता रसिक प्रेक्षकांसाठी मराठी विनोदी नाटकाचे आयोजन करण्यात आले आहे.
शुक्रवार, १३ नोव्हेंबर रोजी रात्री १० वाजता महिलांसाठी खास लोकप्रिय ‘होम मिनिस्टर’ कार्यक्रम होणार आहे. तर शनिवार, १४ नोव्हेंबर रोजी रात्री ९ वाजता खुली रेकॉर्ड डान्स स्पर्धा आयोजित करण्यात आली आहे.
स्पर्धकांनी नावनोंदणी करण्याचे आवाहन
विविध स्पर्धांमध्ये सहभागी होऊ इच्छिणाऱ्या स्पर्धकांनी कु. महेश वर्दम, कु. निखिल जुवेकर, निलेश तळणकर, सौ. शोभना जुवेकर व कु. निशिगंधा भुजंगे यांच्याकडे आपली नावनोंदणी करावी, असे आवाहन आयोजकांनी केले आहे. तसेच भेडशी परिसरातील नागरिक, महिला मंडळे, युवक आणि बालगोपाळांनी मोठ्या संख्येने सहभागी होऊन दीपोत्सवातील विविध कार्यक्रमांचा आनंद घ्यावा, असे आवाहन श्री दामोदर दीपोत्सव समिती व ग्रामस्थ भेडशी यांच्या वतीने करण्यात आले आहे.
