कणकवली तालुका प्रतिनिधी | अमित तेंडुलकर
नागवे ग्रामस्थांचा पहिल्यांदाच सहपरिवार देवता दर्शन सोहळा.
कणकवली : कोकणची काशी म्हणून ओळखल्या जाणाऱ्या तीर्थक्षेत्र कुणकेश्वराच्या चरणी यावर्षी एक ऐतिहासिक सोहळा रंगणार आहे. नागवे गावचे ग्रामदैवत श्री नागेश्वर आपल्या संपूर्ण देव-परिवार, पंचतरंग आणि लवाजम्यासह रविवारी १५ फेब्रुवारी (महाशिवरात्री) रोजी श्री देव कुणकेश्वर महास्थानच्या भेटीला जाणार आहेत.
नागवे ग्रामस्थांच्या इतिहासात प्रथमच हा नयनरम्य सोहळा संपन्न होत असल्याने संपूर्ण ग्रामस्थांमध्ये भक्तिमय वातावरण निर्माण झाले आहे. या यात्रेच्या पूर्वतयारीसाठी गेल्या चार दिवसापूर्वी श्री देव नागेश्वर मंदिरात ठराविक ग्रामस्थांची सभा झाली सर्वांच्या उपस्थितीत यात्रेचा आराखडा सर्वांच्या ऐपतीप्रमाणे यात्रेसाठी होणारा खर्च देणगी देण्याचे निश्चित केला गेलेला आहे. प्रवासाची व्यवस्था, दोन दिवस सोबत जाणाऱ्यांची राहण्याची आणि भोजन व्यवस्थे बाबत चोख नियोजन करण्यात आले आहे.
नागवे गावच्या देवता प्रथमच अधिकृतपणे श्री देव कुणकेश्वर भेटीला प्रस्थान करणार आहेत.
हा दर्शन सोहळा १५ ते १७ फेब्रुवारी असा तीन दिवस चालणार असून, यामध्ये हजारो महादेव भक्त भाविक सहभागी होणार आहेत.
रविवार १५ फेब्रुवारीला दुपारी १२ वाजता श्री देव नागेश्वर मंदिरातून श्री देव कुणकेश्वर दर्शन यात्रेचा प्रारंभ होणार आहे. १५ व १६ फेब्रुवारीला तीर्थक्षेत्री वास्तव असणार आहे. मंगळवार १७ फेब्रुवारी रोजी पहाटे देवतांचे व भाविकांचे पवित्र तीर्थस्नान होऊन श्री देव कुणकेश्वर दर्शन होईल. त्यानंतर दुपारी सोबत गेलेल्या सर्व भाविकांचा महाप्रसाद झाल्यानंतर श्री देव नागेश्वर सह परिवार देवता, यात्रेची सांगता नागवे या गावी मूळ ठिकाणी श्री देव नागेश्वर मंदिरात होणार आहे. यात्रेत सहभागी होणाऱ्या प्रत्येक भाविकाला श्री देव कुणकेश्वर दर्शनासाठी श्री नागेश्वर देवस्थानचा विशेष ‘ आणि “टोपी” देण्यात येणार आहे.
विशेष सुचना आपल्या देवतांसोबत चालणे हा भाग्याचा ठेवा आहे. या यात्रेदरम्यान सर्व भाविकांनी नागवे गावाची आणि देवस्थानची प्रतिष्ठा जपून शिस्तबद्ध रितीने कसलाही तंटा क्लेश न करता दर्शन घ्यावे, असे आवाहन श्री देव नागेश्वर मंदिर देवस्थान ट्रस्ट व पुढारी यांच्यावतीने सर्वांना करण्यात आले आहे.
