किल्ले धारूर प्रतिनिधी:विष्णु लांडगे
सार्वजनिक शिवजयंती उत्सव समिती, किल्ले धारूर यांच्या वतीने यंदा १९ फेब्रुवारी २०२६ रोजी छत्रपती शिवाजी महाराजांची जयंती मोठ्या उत्साहात आणि विविध उपक्रमांनी साजरी करण्यात येणार असून हा उत्सव यावर्षी ३७ व्या वर्षात पदार्पण करत आहे. गेली तीन दशके संस्थापक अध्यक्ष स्वर्गीय नामदेवरावजी शिनगारे यांनी सुरू केलेली ही परंपरा शिवप्रेमींनी अखंडपणे जपली असून सामाजिक, सांस्कृतिक आणि जनजागृतीपर कार्यक्रमांद्वारे गावात एक सकारात्मक वातावरण निर्माण करण्यात समितीचे मोठे योगदान आहे.यंदाच्या शिवजयंतीनिमित्त रवी विजय हॉस्पिटल यांच्या विद्यमाने भव्य सर्वरोग निदान व महिला आरोग्य तपासणी शिबिराचे आयोजन करण्यात आले आहे. हे शिबिर रणवीर हॉस्पिटल, जुन्या हैदराबाद बँक शेजारी, किल्ले धारूर येथे होणार असून डॉ.भाग्यश्री सावंत, डॉ. ऐश्वर्या सावंत व डॉ. मयूर सावंत यांच्यासह तज्ज्ञ डॉक्टरांची टीम नागरिकांना आरोग्य सेवा देणार आहे. या शिबिराचा लाभ नागरिकांनी मोठ्या संख्येने घ्यावा, असे आवाहन समितीने केले आहे.उत्सवानिमित्त सोमवार, दि. १६ फेब्रुवारी रोजी रात्री ८ ते १० या वेळेत सुप्रसिद्ध शिवचरित्रकार ह.भ.प. डॉ. प्रवीण महाराज दुशिंग (झी टॉकीज प्रेम वैजापूर) यांचे शिवचरित्रावर मार्गदर्शन होणार आहे. त्यानंतर मंगळवार, दि. १७ फेब्रुवारी २०२६ रोजी रात्री ८ ते १० या वेळेत समाजप्रबोधनकार ह.भ.प. गणेश महाराज गवारे (जालना) यांचे समाजप्रबोधनपर कीर्तन आयोजित करण्यात आले आहे.मुख्य शिवजयंती दिनी गुरुवार, दि. १९ फेब्रुवारी रोजी सकाळी ११ वाजता छत्रपती शिवाजी महाराज चौक येथे ध्वजारोहणाचा कार्यक्रम पार पडणार आहे. त्यानंतर दुपारी १२ वाजता चावडी कसबा विभाग येथे छत्रपती शिवाजी महाराजांचा पाळणा सोहळा आयोजित करण्यात येणार आहे. संध्याकाळी ५ वाजता कसबा विभागातून सुरू होणारी भव्य मिरवणूक छत्रपती शिवाजी महाराज चौक, क्रांती चौक, काशिनाथ चौक, नगरपरिषद परिसर व जावळीकर व इतर विभागांमधून मार्गक्रमण करणार आहे. मिरवणुकीचे प्रमुख आकर्षण म्हणून कोल्हापूर येथील शिवशंभू मर्दानी खेळ पथक आपले सादरीकरण करणार आहे.सार्वजनिक शिवजयंती उत्सव समितीच्या माध्यमातून गेली ३७ वर्षे गावामध्ये सामाजिक कार्यक्रम, सांस्कृतिक उपक्रम, विविध स्पर्धा आणि गरजूंना मदतीचे कार्य सातत्याने सुरू आहे. संस्थापक अध्यक्ष स्वर्गीय नामदेवराव शिनगारे यांनी रुजवलेली ही परंपरा शिवप्रेमींनी निष्ठेने पुढे नेली असून आगामी काळातही समाजहिताचे उपक्रम राबवण्याचा संकल्प समितीने व्यक्त केला आहे.यंदाच्या शिवजयंती उत्सवामुळे किल्ले धारूरमध्ये शिवभक्तीचे आणि सामाजिक एकतेचे वातावरण निर्माण होणार असून नागरिकांनी मोठ्या संख्येने सहभागी होऊन कार्यक्रमांना यशस्वी करावे, असे आवाहन सार्वजनिक शिवजयंती च्या उत्सव समितीने केले आहे.
