दापोली | दि. १७ फेब्रुवारी २०२६ | प्रतिनिधी:
आगामी रमजान व होळी सणांच्या पार्श्वभूमीवर तालुक्यात कायदा व सुव्यवस्था अबाधित राखण्यासाठी दापोली पोलीस ठाण्यात मंगळवारी सकाळी ११ वाजता शांतता समितीची उच्चस्तरीय बैठक पार पडली.
बैठकीस दोन्ही समाजांतील मान्यवर, सर्वपक्षीय राजकीय पदाधिकारी, सामाजिक कार्यकर्ते तसेच स्थानिक नागरिक उपस्थित होते. सणांच्या काळात अफवा, भडक संदेश किंवा सोशल मीडियावरील आक्षेपार्ह पोस्टमुळे तणाव निर्माण होऊ नये, यासाठी सर्वांनी समन्वय आणि संयम राखण्याचे आवाहन करण्यात आले.
पोलीस अधिकाऱ्यांनी स्पष्ट केले की शांतता व सामाजिक सलोखा राखणे ही केवळ प्रशासनाची जबाबदारी नसून प्रत्येक नागरिकाची सामूहिक जबाबदारी आहे. कोणतीही संशयास्पद बाब निदर्शनास आल्यास त्वरित पोलीस ठाण्याशी संपर्क साधावा, असेही मार्गदर्शन करण्यात आले.
बैठक सकारात्मक वातावरणात पार पडली असून आगामी सण शांततेत आणि उत्साहात साजरे करण्याचा निर्धार सर्वांनी व्यक्त केला.
