लातूर प्रतिनिधी- शारीरिक मोजमाप व मैदानी चाचणीचे आयोजन; गुणांची यादी संकेतस्थळावर प्रसिद्धलातूर जिल्हा पोलीस दलाच्या आस्थापनेवरील चालक पोलीस शिपाई भरती सन २०२४-२०२५ अंतर्गत “शारीरिक मोजमाप व शारीरिक चाचणी” प्रक्रिया दिनांक १७ फेब्रुवारी २०२६ रोजी सकाळी ४ वाजल्यापासून पोलीस मुख्यालय, बाभळगाव (लातूर) येथे सुरू झाली. या भरती प्रक्रियेसाठी त्या दिवशी ८०० पुरुष उमेदवारांना बोलावण्यात आले होते. त्यापैकी ४८९ उमेदवार उपस्थित राहिले, तर ३११ उमेदवार गैरहजर राहिल्याची माहिती पोलीस प्रशासनाने दिली आहे.भरती प्रक्रियेत उपस्थित उमेदवारांपैकी १७ उमेदवार अपात्र ठरले असून उर्वरित ४७२ उमेदवार मैदानी शारीरिक चाचणीसाठी पात्र ठरले आहेत. पात्र उमेदवारांची १६०० मीटर धावणे तसेच गोळाफेक चाचणी घेण्यात आली.
या चाचणीतील उमेदवारांना मिळालेल्या गुणांची यादी लातूर पोलीस दलाच्या अधिकृत संकेतस्थळ www.laturpolice.gov.in� वर प्रसिद्ध करण्यात आली असून पोलीस अधीक्षक कार्यालय व पोलीस मुख्यालयाच्या दर्शनी भागावरही लावण्यात आली आहे.प्रसिद्ध करण्यात आलेल्या गुणांबाबत उमेदवारांना काही आक्षेप असल्यास त्यांनी ४८ तासांच्या आत sp.latur@mahapolice.gov.in या ई-मेलवर लेखी स्वरूपात नोंदवावा, असे आवाहन करण्यात आले आहे. ठरलेल्या मुदतीनंतर प्राप्त होणाऱ्या आक्षेपांचा विचार केला जाणार नाही, असेही प्रशासनाने स्पष्ट केले आहे.दरम्यान, दिनांक १८ फेब्रुवारी २०२६ रोजी चालक पोलीस शिपाई पदाच्या पुढील मैदानी चाचणीसाठी उमेदवारांनी सकाळी ४ वाजता पोलीस मुख्यालय, बाभळगाव येथे उपस्थित राहणे आवश्यक आहे.
सर्व उमेदवारांनी सकाळी ९ वाजेपर्यंत मैदानावर हजेरी लावणे अनिवार्य आहे. उमेदवारांनी ऑनलाईन भरलेला मूळ अर्ज, प्रवेशपत्र, वाहन परवाना, चार पासपोर्ट साईज फोटो तसेच आधार कार्ड, पॅन कार्ड, मतदान ओळखपत्र किंवा इतर ओळखपत्रांसह उपस्थित राहावे, असे निर्देश देण्यात आले आहेत.भरती प्रक्रियेदरम्यान शारीरिक मोजमाप चाचणीत पात्र ठरणाऱ्या उमेदवारांचीच मैदानी क्षमता चाचणी घेण्यात येणार असून प्रत्येक टप्प्यावर पात्र उमेदवारांनी उपस्थित राहणे बंधनकारक असल्याचे पोलीस प्रशासनाने कळविले आहे.
