आमदार योगेश सागर यांच्या निधीतून मंदिर सुशोभीकरणासह शौचालयाचे बांधकाम होणार; स्थानिक भजनी मंडळाच्या प्रयत्नांना यश
भारत कवितके | मुंबई, कांदिवली पश्चिम : कांदिवली पश्चिम येथील इराणीवाडी परिसरात विठ्ठल-रुक्मिणी मंदिराच्या सुशोभीकरणासह शौचालय बांधकामाच्या विकासकामांचा भूमिपूजन समारंभ शनिवार, दि. ३१ ऑक्टोबर २०२६ रोजी सकाळी ९ वाजता उत्साहात पार पडला. आमदार योगेश सागर यांच्या निधीतून श्री सिद्धिविनायक (एस.आर.ए.) सहकारी गृहनिर्माण संस्था, रोड क्रमांक ३, इराणीवाडी येथील मंदिर परिसरात हे काम करण्यात येणार आहे. आमदार योगेश सागर यांच्या हस्ते भूमिपूजन करण्यात आले.
विठ्ठल-रुक्मिणी मंदिराच्या सुशोभीकरणासाठी आणि आवश्यक सुविधांसाठी येथील स्थानिक भजनी मंडळ व रहिवाशांना अनेक दिवस प्रयत्न करावे लागले. या काळात माजी खासदार गोपाळ शेट्टी, आमदार योगेश सागर तसेच स्थानिक नगरसेवक व नगरसेविकांनी भजनी मंडळाच्या मागण्यांना सकारात्मक प्रतिसाद देत सहकार्य केले. या प्रयत्नांचे फलित म्हणून अखेर मंदिर सुशोभीकरण आणि शौचालय बांधकामाच्या विकासकामांना सुरुवात होत आहे.
या भूमिपूजन समारंभाला आमदार योगेश सागर, महामंत्री योगेश पडवळ, गिरीधर साळुंखे, पत्रकार, साहित्यिक, गीतकार व सामाजिक कार्यकर्ते भारत कवितके, ज्ञानोबा-तुकाराम वारकरी संप्रदाय भजनी मंडळाचे सर्व वारकरी, पदाधिकारी, कार्यकर्ते तसेच परिसरातील रहिवासी आणि महिला मोठ्या संख्येने उपस्थित होते.
मंदिराच्या सुशोभीकरणामुळे परिसरातील धार्मिक आणि सामाजिक उपक्रमांना अधिक चांगल्या सुविधा उपलब्ध होणार असल्याने स्थानिक रहिवाशांमध्ये समाधान व्यक्त होत आहे.
