सरदार वल्लभभाई पटेल यांच्या जयंतीनिमित्त दूरदर्शनवरील विशेष कार्यक्रमाचे प्रक्षेपण; एकता आणि राष्ट्रीय अखंडतेची शपथ
भारत कवितके | मुंबई, कांदिवली पश्चिम : राष्ट्रीय एकता दिनानिमित्त कांदिवली पश्चिम पोलीस ठाण्यात शनिवार, दि. ३१ ऑक्टोबर २०२६ रोजी सायंकाळी ५ वाजता विशेष कार्यक्रमाचे आयोजन करण्यात आले होते. या वेळी दूरदर्शनवर प्रसारित होणाऱ्या राष्ट्रीय एकता दिनाच्या कार्यक्रमाचे प्रक्षेपण उपस्थितांना दाखविण्यात आले.
कांदिवली पोलीस ठाण्याचे वरिष्ठ पोलीस निरीक्षक करण सोनकवडे यांच्या नेतृत्वाखाली पोलीस निरीक्षक स्वप्नील घोंगडे यांनी या कार्यक्रमाचे आयोजन केले. यावेळी कांदिवली परिसरातील शाळा व महाविद्यालयांमधील स्काऊट-गाईडचे विद्यार्थी-विद्यार्थिनी, विभागातील प्रतिष्ठित नागरिक आणि मोहल्ला कमिटीचे सदस्य सहभागी झाले होते.
३१ ऑक्टोबर हा लोहपुरुष सरदार वल्लभभाई पटेल यांचा जयंतीदिन तसेच माजी पंतप्रधान इंदिरा गांधी यांचा स्मृतिदिन असल्याने राष्ट्रीय एकता दिन साजरा करण्यात आला. पोलीस निरीक्षक स्वप्नील घोंगडे यांनी सरदार वल्लभभाई पटेल यांच्या जयंतीनिमित्त त्यांच्या कार्याचा गौरव केला.
यावेळी गुजरात येथे पंतप्रधान नरेंद्र मोदी यांनी केलेले मार्गदर्शन, राष्ट्रीय एकता अबाधित राखण्याची शपथ, सैनिकांचे संचलन, राष्ट्रगीत आदी कार्यक्रमांचे दूरदर्शनवरून थेट प्रक्षेपण दाखविण्यात आले.
कार्यक्रमाच्या प्रारंभी पोलीस ठाण्यात सरदार वल्लभभाई पटेल आणि इंदिरा गांधी यांच्या प्रतिमांना पुष्पहार अर्पण करून अभिवादन करण्यात आले. यावेळी पत्रकार, साहित्यिक, गीतकार व सामाजिक कार्यकर्ते भारत कवितके, गावठाण तलावाचे प्रमुख नरेंद्र मुन्वाचार्य, मुन्नाभाई शेख यांच्यासह इतर नागरिक आणि पोलीस कर्मचारी उपस्थित होते.
राष्ट्रीय एकता, सामाजिक सलोखा आणि देशाची अखंडता जपण्याचा संदेश या कार्यक्रमातून देण्यात आला.
