सांगली/जत:(जत प्रतिनिधी)
प्रशासनाला अधिक लोकाभिमुख करण्यासाठी आणि नागरिकांची महसूल विभागाशी संबंधित प्रलंबित कामे तातडीने मार्गी लावण्यासाठी सांगली जिल्हाधिकारी कार्यालयाच्या वतीने जत तालुक्यात ‘छत्रपती शिवाजी महाराज महाराजस्व समाधान शिबिर’ (टप्पा-१) चे आयोजन करण्यात आले आहे. या विशेष मोहिमेमुळे तालुक्यातील नागरिकांना दाखले आणि जमिनीच्या कामांसाठी आता सरकारी कार्यालयांचे उंबरठे झिजवावे लागणार नाहीत.
एकाच ठिकाणी मिळणार ‘या’ महत्त्वपूर्ण सेवा
या शिबिरामध्ये मुख्यत्वे तीन विभागांतर्गत सेवांचे वाटप केले जाणार आहे:
प्रमाणपत्रे आणि दाखले: प्रलंबित फेरफार, ७/१२ दुरुस्ती, डिजिटल स्वाक्षरीचे ७/१२ व ८-अ, उत्पन्न, रहिवासी, जात प्रमाणपत्र आणि नॉन-क्रिमिलेअर दाखल्यांचे जागेवरच वाटप.
जमीन अभिलेख अद्ययावतीकरण: अकृषिक (NA) प्रकरणांबाबत मार्गदर्शन, तुकडेबंदी प्रकरणांचा निपटारा आणि भू-संपादन प्रक्रियेतील त्रुटी दूर करून गाव दप्तर अद्ययावत करणे.
योजनांचा लाभ: संजय गांधी निराधार योजना, घरकुलासाठी पट्टे वाटप, ई-पीक नोंदणी आणि पी.एम. किसान सन्मान निधी योजनेची प्रलंबित कामे.
या शिबिरात महसूल विभागासोबतच नगर परिषद, पंचायत समिती आणि आरोग्य विभागाचे स्टॉल्सही असणार आहेत, ज्यामुळे एकाच ठिकाणी विविध शासकीय सुविधा मिळतील.
असे असेल जत तालुक्यातील शिबिरांचे वेळापत्रक
नागरिकांनी आपल्या मंडळाच्या वेळापत्रकानुसार शिबिराचा लाभ घ्यावा:
तारीख मंडळ / ठिकाण
७ मार्च २०२६ डफळापूर मंडळ
१५ मार्च २०२६ कुंभारी मंडळ
१० एप्रिल २०२६ शेगाव मंडळ
१७ एप्रिल २०२६ वळसंग मंडळ
८ मे २०२६ जत मंडळ
१५ मे २०२६ जत तहसील कार्यालय
प्रशासनाचे आवाहन:
ज्या नागरिकांची कामे प्रलंबित आहेत, त्यांनी शिबिराच्या दिनांकापूर्वी आपले अर्ज संबंधित ग्राम महसूल अधिकारी (तलाठी) किंवा मंडळ अधिकारी यांच्याकडे आगाऊ नोंदवावेत, जेणेकरून शिबिराच्या दिवशी कामांचा निपटारा करणे सोपे होईल.
जास्तीत जास्त नागरिकांनी या सुवर्णसंधीचा लाभ घ्यावा, असे आवाहन प्रशासनातर्फे करण्यात आले आहे.
