महिला, ज्येष्ठ नागरिक आणि शेतकऱ्यांना गैरसोय; स्वच्छतागृहाची तातडीने स्वच्छता करण्याची नागरिकांची मागणी
श्रीगोंदा / प्रतिनिधी
श्रीगोंदा तालुक्यातील महत्त्वाचे प्रशासकीय केंद्र असलेल्या तहसील कार्यालयाच्या बाहेरील आवारातील स्वच्छतागृहाची दुरवस्था झाली असून, तेथून येणाऱ्या तीव्र दुर्गंधीमुळे नागरिकांना मोठ्या गैरसोयीचा सामना करावा लागत आहे. विविध शासकीय कामांसाठी दररोज तहसील कार्यालयात येणाऱ्या महिला, ज्येष्ठ नागरिक, शेतकरी आणि सर्वसामान्य नागरिकांना या परिस्थितीचा त्रास सहन करावा लागत असल्याच्या तक्रारी नागरिकांकडून केल्या जात आहेत.
एकीकडे शासनाच्या माध्यमातून स्वच्छ भारत अभियानांतर्गत स्वच्छतेचा संदेश दिला जात असताना, तालुक्याच्या प्रमुख प्रशासकीय कार्यालयाच्या आवारातील स्वच्छतागृहाची अशी अवस्था असल्याने स्वच्छतेच्या अंमलबजावणीबाबत प्रश्न उपस्थित होत आहेत.
शासकीय कामांसाठी तहसील कार्यालयात येणाऱ्या नागरिकांना स्वच्छतागृहाच्या दुर्गंधीमुळे नाहक त्रास सहन करावा लागत आहे. संबंधित विभागाकडून स्वच्छतागृहाची नियमित स्वच्छता आणि देखभाल होणे अपेक्षित असताना या समस्येकडे दुर्लक्ष का होत आहे, असा सवाल नागरिक उपस्थित करीत आहेत.
प्रशासनाला जाग कधी येणार?
संबंधित अधिकाऱ्यांनी या समस्येची तातडीने दखल घेऊन स्वच्छतागृहाची स्वच्छता करावी, नियमित देखभालीची व्यवस्था करावी आणि दुर्गंधीची समस्या कायमस्वरूपी दूर करावी, अशी मागणी नागरिकांकडून होत आहे. स्वच्छतेच्या घोषणा करण्याबरोबरच प्रत्यक्ष कृतीतून नागरिकांना स्वच्छ व आरोग्यदायी परिसर उपलब्ध करून द्यावा, अशी अपेक्षा व्यक्त केली जात आहे.
