मुक्ताई व्यसनमुक्ती केंद्रातील व्यक्तींचा सर्जनशीलतेतून परिवर्तनाचा संदेश; टाकाऊ बाटल्यांना फुलदाण्यांचे रूप
छत्रपती संभाजीनगर / प्रतिनिधी
ज्या दारूच्या बाटल्यांमुळे अनेकांचे आयुष्य व्यसनाच्या विळख्यात अडकले, त्याच रिकाम्या बाटल्यांना सुंदर फुलदाण्यांचे रूप देत व्यसनमुक्त झालेल्या व्यक्तींनी परिवर्तनाचा अनोखा संदेश दिला आहे. छत्रपती संभाजीनगर येथील मुक्ताई व्यसनमुक्ती व पुनर्वसन केंद्रात हा प्रेरणादायी उपक्रम राबविण्यात आला.
केंद्रातील व्यक्तींनी दारूच्या रिकाम्या बाटल्यांना विविध रंगांनी सजवून आकर्षक फुलदाण्या तयार केल्या आहेत. याशिवाय दिवाळीनिमित्त आकाशकंदील, रंगीबेरंगी पणत्या, मेणबत्त्या आणि विविध सजावटीच्या वस्तूही स्वतःच्या हातांनी बनविल्या आहेत. या कलाकृतींचे प्रदर्शनही भरविण्यात आले.
व्यसनातून सर्जनशीलतेकडे नवी वाटचाल!
हा उपक्रम केवळ हस्तकलेपुरता मर्यादित नसून व्यसनमुक्तीनंतर नव्याने आयुष्य घडविण्याची प्रेरणा देणारा ठरत आहे. या माध्यमातून केंद्रातील व्यक्तींच्या कलागुणांना वाव मिळत असून एकाग्रता, संयम आणि आत्मविश्वास वाढण्यास मदत होत आहे.
व्यसनमुक्त झालेल्या व्यक्तींना केवळ व्यसनापासून दूर ठेवणे पुरेसे नाही, तर त्यांच्या हाताला काम, मनाला आधार आणि आयुष्याला नवी दिशा मिळणेही महत्त्वाचे आहे, अशी भावना मुक्ताई व्यसनमुक्ती व पुनर्वसन केंद्राचे डॉ. सुनील नागरगोजे यांनी व्यक्त केली.
कधीकाळी ज्या बाटल्यांनी आयुष्याचे रंग हिरावून घेतले, आज त्याच बाटल्यांत रंगीबेरंगी फुले सजत आहेत. हा बदल केवळ वस्तूंचा नसून विचारांचा, दृष्टिकोनाचा आणि नव्याने जगण्याच्या उमेदेचा आहे. या उपक्रमातून व्यसनमुक्तीनंतरही आयुष्य सुंदर आणि सर्जनशील बनवता येते, हा सकारात्मक संदेश समाजापर्यंत पोहोचत आहे.
