अहोरात्र विद्युत ग्राहकांना अखंडित विद्युत पुरवठा होण्यासाठी ऊन पावसाची तमा न बाळगता दिवस रात्र झटणाऱ्या जिल्ह्यातील हजाराहून अधिक ‘प्रकाशदूत’ अर्थात लाईनमन यांचा सत्कार सोहळा संबंधित कार्यालयामध्ये संपन्न झाला. अधीक्षक अभियंता अमित बोकील यांनी प्रकाश दुतांचा सन्मान केला यावेळी कार्यकारी अभियंता आशिष मेहता यांच्या सह अधिकारी उपस्थित होते. याप्रसंगी उपस्थितानी सुरक्षेविषयी शपथ घेतली. महावितरण च्या सांगली शहर विभागाने विश्रामबाग येथील खरे सांस्कृतिक भवन येथे या कार्यक्रमाचे आयोजन केले. या कार्यक्रमासाठी अधीक्षक अभियंता अमित बोकील आणी कामगार कल्याण अधिकारी संभाजी पवार प्रमुख पाहुणे म्हणून उपस्थित होते. यावेळी बोकील यांनी लाईनमन अर्थात प्रकाश दूत यांच्या कार्याबद्दल आणी धैर्याबद्दल विशेष कौतुक केले. जिल्ह्यातील संबंधित कार्यालयातील अधिकाऱ्यांनी लाईनमन यांच्या कामाच्या ठिकाणी जाऊन प्रत्यक्ष सन्मान केला यामुळे कर्मचाऱ्यांमध्ये समाधान आणी अधिक उत्साह दिसून आला. आपला जीव धोक्यात घालून नागरिकांच्या सेवेसाठी तत्पर असणाऱ्या लाईनमन यांच्या समर्पणाला यावेळी मानाचा मुजरा करण्यात आला.
