दिवाळीनिमित्त शिक्षक व शिक्षकेतर कर्मचाऱ्यांना भेटवस्तू आणि बोनस; संस्थेच्या प्रेमळ सहकार्याबद्दल व्यक्त केली कृतज्ञता
मेहकर : दिवाळी हा आनंदाचा, उत्साहाचा आणि आपुलकीचा सण. याच मंगलमय सणाचे औचित्य साधून भारतीय ज्ञानपीठ संस्थेच्या वतीने संस्थेतील सर्व शिक्षक व शिक्षकेतर कर्मचाऱ्यांना दिवाळी भेटवस्तू आणि बोनस देण्यात आला. कर्मचाऱ्यांच्या सुख-दुःखात सहभागी होत त्यांच्याप्रती जिव्हाळा आणि आपुलकी व्यक्त करणाऱ्या संस्थेच्या या उपक्रमाबद्दल भारतीय ज्ञानपीठ शाळेत मनःपूर्वक धन्यवाद व कृतज्ञतापूर्वक आभार सोहळा संपन्न झाला.
संस्थेच्या वतीने देण्यात आलेली दिवाळी भेट ही केवळ आर्थिक स्वरूपाची नसून, ती कर्मचाऱ्यांप्रती असलेल्या विश्वासाची, जिव्हाळ्याची आणि आदराची अनमोल पावती असल्याची भावना यावेळी व्यक्त करण्यात आली. संस्थेने प्रत्येक कर्मचारी वर्गाचा विचार करून सणाच्या आनंदात सहभागी करून घेतल्याबद्दल शिक्षक व शिक्षकेतर कर्मचाऱ्यांनी कृतज्ञता व्यक्त केली.
भारतीय ज्ञानपीठ मेहकर संस्थेची यशस्वी वाटचाल अशीच निरंतर सुरू राहावी आणि संस्थेच्या मार्गदर्शनाखाली शैक्षणिक क्षेत्रात नवनवीन यश संपादन व्हावे, अशा सदिच्छाही यावेळी व्यक्त करण्यात आल्या.
या प्रसंगी संस्थेचे अध्यक्ष ललित इन्नानी, उपाध्यक्ष रविकुमारजी अग्रवाल, सचिव विशाल काबरा आणि कोषाध्यक्ष सिद्धेशजी व्यास यांनी सर्व शिक्षक व शिक्षकेतर कर्मचाऱ्यांचे मनःपूर्वक आभार व्यक्त केले. संस्थेच्या या उपक्रमामुळे कर्मचारी वर्गात आनंदाचे आणि समाधानाचे वातावरण निर्माण झाले.
