जागतिक संवाद, मैत्री आणि एकतेचा संदेश देणाऱ्या ‘सन्मतितर्क-प्रकरण’ ग्रंथाचे माटुंगा येथे भव्य विमोचन
मुंबई : आधुनिकतेच्या आणि भौतिक प्रगतीच्या शर्यतीत धावताना आजचा मनुष्य जीवनातील मूलभूत मूल्यांपासून दूर जात असल्याचे चित्र दिसत आहे. अशा परिस्थितीत मानवाला पुन्हा एकदा नैतिकता, मैत्री, सहिष्णुता आणि विश्वबंधुत्वाच्या मूल्यांशी जोडण्याच्या उद्देशाने मुंबईतील माटुंगा येथील जैन आराधना भवनात समर्पण व ग्रंथ विमोचन सोहळा उत्साहात संपन्न झाला.
संपूर्ण विश्वात शांतता, परस्पर संवाद, मैत्री आणि एकतेची भावना निर्माण करण्याच्या व्यापक उद्देशाने या कार्यक्रमाचे आयोजन करण्यात आले होते. यावेळी ‘सन्मतितर्क-प्रकरण’ या महत्त्वपूर्ण ग्रंथाचे भव्य प्रकाशन करण्यात आले. जग अधिक सुंदर, शांततापूर्ण आणि मैत्रीपूर्ण बनविण्यासाठी विचारांचा संवाद तसेच विविध मतप्रवाहांमधील समन्वय किती आवश्यक आहे, यावर या ग्रंथाच्या माध्यमातून प्रकाश टाकण्यात आला.
‘सन्मतितर्क-प्रकरण’ हा ‘वादमहार्णव’ आणि ‘न्यायसुधा’ यांच्यासह सहा खंडांमध्ये प्रकाशित करण्यात आलेला सुमारे ४,२०० पृष्ठांचा विशाल शास्त्रीय ग्रंथ आहे. जैन तत्त्वज्ञान, तर्कशास्त्र, न्यायशास्त्र आणि वैचारिक संवादाच्या दृष्टीने या ग्रंथाला विशेष महत्त्व आहे.
विशेष म्हणजे, आचार्य श्री विजय नेमिसूरीश्वरजी महाराज यांनी रचलेला अत्यंत दुर्मीळ हस्तलिखित ग्रंथ ‘न्यायसुधा’ अनेक दशकांपासून अप्रकाशित अवस्थेत होता. दीर्घकाळ चाललेल्या शोधमोहिमेनंतर हे मौल्यवान हस्तलिखित अहमदाबाद येथे जुन्या दस्तऐवजांमध्ये आढळून आले. त्यानंतर या ग्रंथाचे सखोल संशोधन, अभ्यास आणि संपादन करण्यात आले. मूळ ग्रंथ आणि त्यावरील टीकेसह तो प्रथमच प्रकाशित करण्यात आला आहे.
जैन धर्माच्या प्राचीन ज्ञानपरंपरेचे जतन आणि संवर्धन करण्याच्या दृष्टीने या प्रकाशनाला विशेष महत्त्व प्राप्त झाले आहे. विश्वात मैत्री, संवाद, सहअस्तित्व आणि एकतेची भावना रुजविण्यासाठी प्राचीन तत्त्वज्ञानातील विचार आधुनिक समाजापर्यंत पोहोचविण्याचा महत्त्वपूर्ण प्रयत्न या उपक्रमातून करण्यात आला आहे. वैचारिक मतभेदांऐवजी संवाद आणि समन्वयातून शांततापूर्ण विश्वनिर्मितीचा संदेश या ग्रंथाच्या माध्यमातून देण्यात आला आहे.
