पनवेल प्रतिनिधी : जागतिक महिला दिनाच्या पार्श्वभूमीवर पनवेल महानगरपालिका यांच्या वतीने महिलांच्या बचत गटांनी तयार केलेल्या विविध वस्तूंचे भव्य विक्री व प्रदर्शन आयोजित करण्यात आले आहे. या प्रदर्शनाचे उद्घाटन दि. ७ मार्च २०२६ रोजी सकाळी ११ वाजता प्रमिला पाटील (उपमहापौर) यांच्या हस्ते आद्य क्रांतीवीर वासुदेव बळवंत फडके नाट्यगृह येथे होणार आहे.
महिलांना स्वावलंबी व सशक्त बनविणे तसेच त्यांच्या व्यवसायिक व सामाजिक कौशल्यांना चालना देणे हा या उपक्रमाचा उद्देश आहे. महापालिका क्षेत्रातील महिलांच्या सक्षमीकरणासाठी हा उपक्रम नितिन पाटील (महापौर) व मंगेश चितळे (आयुक्त) यांच्या मार्गदर्शनाखाली आयोजित करण्यात आला आहे.
हे प्रदर्शन शनिवार, रविवार आणि सोमवार असे तीन दिवस चालणार असून बचत गटांनी तयार केलेल्या विविध उत्पादनांची विक्री येथे होणार आहे. या मेळाव्यामध्ये खाद्यपदार्थ, दागिने, लोकरीच्या वस्तू, मोत्याच्या वस्तू, बेडशीट, कपडे, साड्या आदी विविध वस्तूंचा समावेश असणार आहे.
महापालिका कार्यक्षेत्रातील नागरिकांनी मोठ्या संख्येने या प्रदर्शनास भेट देऊन महिला बचत गटांना प्रोत्साहन द्यावे, असे आवाहन अतिरिक्त आयुक्त महेशकुमार मेघमाळे यांनी केले आहे.
