रायगड प्रतिनिधी :
मा. मुंबई उच्च न्यायालय विधी सेवा समिती यांच्या निर्देशानुसार आणि प्रमुख जिल्हा व सत्र न्यायाधीश तथा अध्यक्ष जिल्हा विधी सेवा प्राधिकरण रायगड राजेंद्र सावंत यांच्या मार्गदर्शनाखाली “न्याय आपल्या दारी” या उपक्रमांतर्गत रायगड जिल्ह्यात फिरते लोक अदालत व कायदेविषयक शिबिरांचे आयोजन करण्यात आले आहे.
दि. २ मार्च ते ३० मार्च २०२६ या कालावधीत संपूर्ण रायगड जिल्ह्यात फिरते लोक अदालत कार्यरत राहणार असून विविध तालुक्यांमध्ये जाऊन प्रलंबित प्रकरणांचा तडजोडीने निपटारा तसेच नागरिकांना कायदेविषयक मार्गदर्शन करण्यात येणार आहे.
या उपक्रमाचा उद्घाटन समारंभ २ मार्च २०२६ रोजी सकाळी १०.३० वाजता रायगड जिल्हा न्यायालय, अलिबाग येथे जिल्हा न्यायाधीश–२ एस. आर. तिवारी यांच्या हस्ते संपन्न झाला.
या फिरत्या लोक अदालतीसाठी निवृत्त न्यायाधीश श्रीकांत उपाध्ये यांची कक्ष न्यायाधीश म्हणून नियुक्ती करण्यात आली आहे. कार्यक्रमाला जिल्हा न्यायाधीश–३ रायगड अलिबाग एस. डी. भगत, न्यायाधीश तथा सचिव जिल्हा विधी सेवा प्राधिकरण रायगड अलिबाग श्रीमती तेजस्विनी निराळे, तसेच अलिबाग वकील संघटनेचे अध्यक्ष प्रसाद पाटील, उपाध्यक्ष ए. डी. पाटील, सचिव अमित देशमुख, न्यायिक अधिकारी व कर्मचारी वर्ग उपस्थित होते.
ही फिरती लोक अदालत ३० मार्च २०२६ पर्यंत जिल्ह्यातील सर्व तालुक्यांमध्ये जाऊन लोक अदालत आयोजित करणार आहे. नागरिकांनी या उपक्रमाचा लाभ घ्यावा, असे आवाहन प्रमुख जिल्हा व सत्र न्यायाधीश तथा अध्यक्ष जिल्हा विधी सेवा प्राधिकरण रायगड अलिबाग राजेंद्र द. सावंत यांनी केले आहे.
“न्याय आपल्या दारी” या संकल्पनेतून सर्वसामान्य नागरिकांना जलद, सुलभ आणि विनामूल्य न्याय सेवा उपलब्ध करून देणे हा या उपक्रमामागील मुख्य उद्देश आहे.
