पनवेल (प्रतिनिधी) : पनवेल महानगरपालिकेचे महापौर नितीन पाटील यांनी पनवेलकरांच्या सेवेसाठी महत्त्वपूर्ण निर्णय घेतला असून महापौर पदावर कार्यरत असताना मिळणारे प्रतिमाह मानधन तसेच विविध भत्ते ‘महापौर सहाय्यता निधी’मध्ये जमा करण्याचा निर्णय जाहीर केला आहे.
महापौर पदावरून मिळणारे प्रतिमाह मानधन, बैठक भत्ता, स्वीय सहाय्यकाचे मानधन तसेच वाहन भत्ता यांची संपूर्ण रक्कम या निधीत जमा करण्यात येणार असल्याचे त्यांनी सांगितले. या निधीच्या माध्यमातून विशेषतः आरोग्यविषयक अडचणींना सामोरे जाणाऱ्या गरजू नागरिकांना मदत व दिलासा देण्याचा उद्देश असल्याचेही त्यांनी स्पष्ट केले.
“पनवेलकर नागरिकांची सेवा हीच माझ्यासाठी सर्वोच्च जबाबदारी आहे. महापौर म्हणून काम करत असताना समाजाप्रती असलेली बांधिलकी कृतीतून दाखवणे महत्त्वाचे आहे. नागरिकांच्या सहकार्याने समाजहिताची ही वाटचाल पुढेही सुरू राहील,” असे महापौर नितीन पाटील यांनी यावेळी सांगितले.
