नंदुरबार आणि गुजरातच्या तापी जिल्ह्यातील शेतकऱ्यांना यंदा प्रतिटन ३,४११ रुपये दर; सहा दिवसांच्या आंदोलनानंतर जिल्हाधिकाऱ्यांच्या उपस्थितीत महत्त्वपूर्ण निर्णय
शहादा, प्रतिनिधी : स्वाभिमानी शेतकरी संघटनेच्या नेतृत्वाखाली ऊस उत्पादक शेतकऱ्यांच्या हक्कासाठी उभारण्यात आलेल्या तीव्र आंदोलनाला अखेर ऐतिहासिक यश मिळाले आहे. नंदुरबार जिल्ह्यासह गुजरात राज्यातील तापी जिल्ह्यातील ऊस उत्पादक शेतकऱ्यांना यंदा प्रतिटन ३,४११ रुपये दर मिळवून देण्यात आला आहे. मागील वर्षी मिळालेल्या २,८०० रुपये दराच्या तुलनेत यंदा तब्बल ६११ रुपयांची वाढ झाल्याने ऊस उत्पादक शेतकऱ्यांची दिवाळी गोड झाली आहे.
याबाबत अधिक माहिती अशी की, ऊस उत्पादक शेतकऱ्यांना योग्य दर मिळावा, यासाठी स्वाभिमानी शेतकरी संघटनेच्या वतीने आंदोलन छेडण्यात आले होते. सलग सहा दिवसांच्या संघर्षानंतर आणि जिल्हाधिकारी कार्यालयात झालेल्या महत्त्वपूर्ण बैठकांनंतर शेतकरी हिताचे अनेक निर्णय घेण्यात आले. या निर्णयामुळे ऊस उत्पादक शेतकऱ्यांना आर्थिक दिलासा मिळाला आहे.
ऊस उत्पादकांसाठी महत्त्वाचे निर्णय
जिल्हाधिकाऱ्यांच्या उपस्थितीत झालेल्या बैठकीत शेतकऱ्यांच्या हिताचे पुढील निर्णय घेण्यात आले आहेत.
१. ऊस तोडणीसाठी मुकादम किंवा सुपरवायझरला शेतकऱ्यांनी एक रुपयाही देऊ नये.
२. ऊस वाहतूक करणाऱ्यांना कोणताही अतिरिक्त भत्ता अथवा खुशाली देण्याची गरज नाही.
३. ऊस तोडणी करताना ऊस जाळून तोडणी केली जाणार नाही.
४. कारखान्याच्या वजनकाट्याबाबत शंका असल्यास शेतकऱ्यांना बाहेरून स्वतः वजन करून घेण्याची मुभा राहील.
५. ऊस तोडणीनंतर २१ दिवसांच्या आत शेतकऱ्यांना उसाचे पेमेंट देणे बंधनकारक राहील.
आंदोलनादरम्यान काही विघ्नसंतोषी व्यक्तींनी अफवा पसरवून शेतकऱ्यांची दिशाभूल करण्याचा प्रयत्न केला. मात्र संघटनेच्या पदाधिकाऱ्यांनी आणि शेतकरी बांधवांनी एकजूट कायम ठेवत आंदोलन सुरूच ठेवले. अखेर सहा दिवसांच्या संघर्षानंतर शेतकऱ्यांच्या मागण्यांना यश मिळाले.
संघर्षात सहकार्य करणाऱ्यांचे मानले आभार
या आंदोलनात अशोक दशरथ पाटील, जगदीश मोहन पाटील, बापूसाहेब दीपकभाई पाटील आणि रामचंद्र दशरथ पाटील यांच्यासह अनेक मान्यवरांचे मोलाचे सहकार्य लाभले. तसेच गेल्या दहा दिवसांपासून आंदोलकांसाठी अन्नदान करणारे दानशूर व्यक्ती आणि चंद्रकांत उद्धव चौधरी (चंदूभाई), केदार सुरेश चौधरी, पुरुषोत्तम काशिनाथ पाटील, विजय पुरुषोत्तम पाटील, शशिकांत मोहन पाटील, दीपक सजन पाटील, अभय गोसावी, उमेश पाटील, हरी कृष्ण गोपाल पाटील, भरत पाटील, कैलास पाटील आणि शरदभाई पाटील यांचे विशेष आभार व्यक्त करण्यात आले.
याशिवाय नर्मदा बचाव आंदोलन व संयुक्त किसान मोर्चाचे अध्यक्ष रामकृष्ण नारायण चौधरी आणि उपाध्यक्ष ओरसिंग टील्या पटले यांचेही मोलाचे योगदान लाभले.
शेतकरी एकजुटीचा विजय
हा विजय कोणत्याही एका व्यक्तीचा नसून तमाम शेतकरी बांधवांच्या एकजुटीचा, संघर्षाचा आणि सामूहिक ताकदीचा विजय असल्याचे संघटनेच्या पदाधिकाऱ्यांनी स्पष्ट केले. शेतकऱ्यांच्या न्याय्य हक्कांसाठी स्वाभिमानी शेतकरी संघटनेचा लढा यापुढेही सुरूच राहील, असा निर्धार प्रदेशाध्यक्ष घनश्याम चौधरी, नंदुरबार जिल्हाध्यक्ष नथ्थू पाटील, जिल्हा कार्याध्यक्ष पमन पाटील, जिल्हा सरचिटणीस आबालाल पाटील, उपाध्यक्ष वसंत पाटील यांच्यासह सर्व तालुका पदाधिकाऱ्यांनी व्यक्त केला.
या निर्णयामुळे नंदुरबार आणि तापी जिल्ह्यातील ऊस उत्पादक शेतकऱ्यांमध्ये समाधानाचे वातावरण निर्माण झाले असून, शेतकरी एकजुटीच्या ताकदीची पुन्हा एकदा प्रचिती आली आहे.
