प्रतिनिधी / ईश्वरपूर :
वाळवा तालुका एज्युकेशन सोसायटीद्वारे संचलित मालती वसंतदादा पाटील कन्या महाविद्यालय, ईश्वरपुर येथे अग्रणी महाविद्यालय योजना अंतर्गत पदवी व पदव्युत्तर हिंदी विभागाच्या वतीने ‘लघुशोध प्रकल्प लेखन एवं पुस्तक परीक्षण’ या विषयावरील एकदिवसीय कार्यशाळा उत्साहात संपन्न झाली.
कार्यशाळेचे प्रमुख मार्गदर्शक म्हणून कर्मवीर भाऊराव पाटील महाविद्यालय, ईश्वरपुर येथील हिंदी विभागाध्यक्ष डॉ. प्रकाश आठवले उपस्थित होते. त्यांनी प्रथम सत्रात ‘पुस्तक परीक्षण’ या विषयावर मार्गदर्शन करताना पुस्तक परीक्षणाची संकल्पना, उद्दिष्टे, तत्त्वे, स्वरूप तसेच त्यातील तांत्रिक बाबी यांचे सविस्तर विवेचन केले.
सिनेमा जसा रसिकांकडून आवडीने पाहिला जातो व त्यावर चिकित्सक चर्चा केली जाते, त्याचप्रमाणे पुस्तक परीक्षण हेही वाचनसंस्कृतीचा एक महत्त्वपूर्ण व विचारप्रधान भाग असल्याचे त्यांनी स्पष्ट केले. पुस्तक परीक्षणाच्या प्रक्रियेत आशय, अभिव्यक्ती, रचना, भाषाशैली, लेखकाची भूमिका तसेच साहित्यिक मूल्यांचा सुसंगत विचार अपेक्षित असतो, असे त्यांनी नमूद केले.
यावेळी विद्यार्थ्यांना पुस्तक परीक्षणाचे काही नमुनेही दाखविण्यात आले.द्वितीय सत्रात ‘संशोधन प्रकल्प’ या विषयावर डॉ. आठवले यांनी मार्गदर्शन केले. संशोधन विषयाची निवड, उद्दिष्टनिश्चिती, गृहीतके, संशोधन पद्धती, माहिती संकलन, संदर्भलेखन, प्रकल्परचना आणि निष्कर्ष मांडणी या संशोधन प्रकल्पाच्या तांत्रिक अंगांबाबत त्यांनी सविस्तर माहिती दिली.संशोधनवृत्ती, चिकित्सक दृष्टी आणि शैक्षणिक शिस्त यांचा विकास घडविण्यास अशा कार्यशाळांचा महत्त्वपूर्ण उपयोग होतो, असे त्यांनी प्रतिपादन केले.
कार्यशाळेच्या उद्घाटनप्रसंगी अध्यक्षस्थानावरून बोलताना प्राचार्य डॉ. अंकुश बेलवटकर यांनी सध्याच्या बदलत्या काळात वाचनसंस्कृती कमी होत असल्याची खंत व्यक्त केली. विद्यार्थ्यांनी नियमित वाचनाची सवय अंगीकारून वाचलेल्या साहित्यकृतींचे परीक्षण करण्याची वृत्ती विकसित करणे आवश्यक असल्याचे त्यांनी सांगितले. अशा प्रकारचे उपक्रम विद्यार्थ्यांच्या वैचारिक आणि शैक्षणिक विकासासाठी उपयुक्त ठरतात, असे प्रतिपादन करून त्यांनी कार्यशाळेस शुभेच्छा दिल्या.
कार्यक्रमाचे स्वागत प्रास्ताविक हिंदी विभाग प्रमुख निलेश डामसे तर सूत्रसंचालन प्रा. संजय चव्हाण यांनी केले.
यावेळी डॉ. अशोक मरळे, कर्मवीर भाऊराव पाटील महाविद्यालयातील हिंदी विभागाचे डॉ. शेख, प्रा. थोरात मॅडम तसेच महाविद्यालयातील प्राध्यापक व शिक्षकेतर कर्मचारी उपस्थित होते.
कर्मवीर भाऊराव पाटील महाविद्यालय आणि मालती वसंतदादा पाटील कन्या महाविद्यालय येथील हिंदी विभागातील विद्यार्थी मोठ्या संख्येने या कार्यशाळेला उपस्थित होते.
