सासवड, प्रतिनिधी :
सासवड येथील वाघीरे महाविद्यालयाच्या भूगोल विभागात आय.बी.एम संस्थेच्या सहकार्याने कृत्रिम बुद्धिमत्ता या विषयावर आधारित एक आठवड्याची प्रमाणित कार्यशाळा उत्साहात पार पडली. दि. ९ मार्च ते १४ मार्च २०२६ या कालावधीत आयोजित करण्यात आलेल्या या कार्यशाळेत भूगोल विभागातील ४० विद्यार्थ्यांनी सहभाग नोंदवून आधुनिक तंत्रज्ञानाचे प्रशिक्षण घेतले.
कार्यशाळेत आय.बी.एम चे तज्ज्ञ प्रशिक्षक श्री. रतन वर्मा यांनी कृत्रिम बुद्धिमत्तेची मूलभूत संकल्पना, भूगोल विषयातील उपयोग आणि भविष्यातील संधी याबाबत विद्यार्थ्यांना मार्गदर्शन केले. या प्रशिक्षणात द्वितीय वर्ष आणि तृतीय वर्ष भूगोल विभागातील विद्यार्थ्यांचा सक्रिय सहभाग होता.
कार्यशाळेच्या समारोपप्रसंगी संचालक संशोधन विभाग
ज्ञानप्रसाद ग्लोबल विद्यापीठ व माजी भौतिकशास्त्र विभाग प्रमुख सावित्रीबाई फुले पुणे विद्यापीठ पुणे डॉ. संजय ढोले प्रमुख पाहुणे म्हणून उपस्थित होते, तर कार्यक्रमाचे अध्यक्षस्थान महाविद्यालयाचे प्राचार्य डॉ. पंडित शेळके यांनी भूषवले. यावेळी मान्यवरांच्या हस्ते आय.बी.एम चे प्रशिक्षक श्री. रतन वर्मा यांचा सत्कार करण्यात आला.
यावेळी डॉ. संजय ढोले यांनी विद्यार्थ्यांशी संवाद साधत कृत्रिम बुद्धिमत्ता संदर्भातील विविध प्रश्न विचारून त्यांच्या ज्ञानाची चाचणी घेतली तसेच या तंत्रज्ञानाचा सामाजिक व भौगोलिक विकासासाठी कसा उपयोग होऊ शकतो याबाबत मार्गदर्शन केले.
भूगोल विभाग प्रमुख प्रा. डॉ. तुषार घोरपडे यांनी कार्यशाळेच्या यशस्वी आयोजनाबद्दल समाधान व्यक्त केले. ही कार्यशाळा यशस्वी करण्यासाठी प्रा.स्वाती जाधव,प्रा.सागर भोसले,
प्रा.मनोज बोडरे, प्रा.कपिल कांबळे, प्रा.रुपाली साठे, प्रा. करिश्मा बरकडे यांनी विशेष परिश्रम घेतले.
या कार्यशाळेमुळे विद्यार्थ्यांना आधुनिक तंत्रज्ञानाची नवी दिशा मिळाल्याने शैक्षणिक वर्तुळातून भूगोल विभागाचे कौतुक होत आहे.
