म्हसळा प्रतिनिधी :-
राज्य निवडणूक आयोगाच्या आदेशानुसार म्हसळा तालुक्यातील ११ ग्रामपंचायतींसाठी पोटनिवडणुकीचा कार्यक्रम जाहीर करण्यात आला आहे. ग्रामपंचायतीतील सदस्य व थेट सरपंच पदे विविध कारणांमुळे रिक्त झाल्याने या जागांसाठी निवडणूक प्रक्रिया राबविण्यात येणार आहे.
राज्य निवडणूक आयोगाच्या सूचनेनुसार तहसीलदारांकडून ३० मार्च २०२६ रोजी निवडणुकीची अधिसूचना प्रसिद्ध केली जाणार आहे. नामनिर्देशनपत्र दाखल करण्याची मुदत ७ एप्रिल ते १३ एप्रिल २०२६ दरम्यान राहणार आहे. नामनिर्देशनपत्रांची छाननी १४ एप्रिल रोजी होईल, तर अर्ज मागे घेण्याची अंतिम तारीख १५ एप्रिल २०२६ निश्चित करण्यात आली आहे.
यानंतर १७ एप्रिल रोजी अंतिम उमेदवारांची यादी जाहीर करून निवडणूक चिन्हांचे वाटप करण्यात येईल. आवश्यक असल्यास मतदान २८ एप्रिल २०२६ रोजी होणार असून, मतमोजणी व निकाल जाहीर करण्याची प्रक्रिया २९ एप्रिल २०२६ रोजी पार पडणार आहे. जिल्हाधिकारी कार्यालयामार्फत निवडणुकीच्या निकालाची अंतिम अधिसूचना ६ मे २०२६ रोजी प्रसिद्ध करण्यात येणार आहे.
या पोटनिवडणुकीत खरसई, वरवठणे, जांभुळ, आडी (खाडी), घोणसे, कोळवट, ठाकरोली, नेवरुळ, कुडगांव, रेवळी आणि फळसप या ११ ग्रामपंचायतींचा समावेश आहे.
ग्रामपंचायत स्तरावरील विकासकामांना गती देण्यासाठी ही पोटनिवडणूक महत्त्वाची मानली जात असून, स्थानिक स्तरावर या निवडणुकीकडे विशेष लक्ष लागले आहे.
