उदगीर प्रतिनिधी 🖊️
उदगीर तालुक्यातील हंडरगुळी येथे आयोजित संयुक्त आरोग्य बैठकीत रुग्णसेवेला प्राधान्य देण्याचा निर्धार व्यक्त करण्यात आला. सर्वसामान्य नागरिकांना शासकीय आरोग्य योजनांचा लाभ प्रभावीपणे मिळावा यासाठी प्रशासनाने पुढाकार घ्यावा, असे प्रतिपादन जिल्हा परिषद सदस्य तथा भाजपचे गटनेते रामभाऊ तिरुके यांनी केले.
हंडरगुळी प्राथमिक आरोग्य केंद्र व वाढवणा प्राथमिक आरोग्य केंद्र यांच्या संयुक्त विद्यमाने आयोजित बैठकीचे अध्यक्षस्थान रामभाऊ तिरुके यांनी भूषविले. यावेळी त्यांनी मार्गदर्शन करताना सांगितले की, आरोग्य सेवा ही प्रत्येक नागरिकापर्यंत पोहोचणे अत्यंत आवश्यक असून अधिकारी व कर्मचाऱ्यांनी जबाबदारीने कार्य करणे गरजेचे आहे.
या बैठकीस राष्ट्रवादी काँग्रेसचे जि.प. गटनेते दिलीपकुमार मटके, जि.प. सदस्य मुकेश भालेराव, पंचायत समिती उपसभापती बापूसाहेब (विकी) पाटील, सदस्य सौ. सुरेखाताई भांगे, तालुका अध्यक्ष बालाजी भोसले पाटील, माजी जि.प. सदस्य उत्तमराव देशमुख, दयानंद कांबळे, सरपंच विजय आंबेकर, चेअरमन संग्रामजी भोसले, तालुका आरोग्य अधिकारी डॉ. सचिन राठोड, वैद्यकीय अधिकारी डॉ. हरेश्वर सुळे, सुदर्शन माने, राजकुमार पाटील यांच्यासह वैद्यकीय अधिकारी, कर्मचारी, आशा कार्यकर्त्या व पत्रकार मोठ्या संख्येने उपस्थित होते.
बैठकीत वैद्यकीय सेवा अधिक प्रभावीपणे राबविणे, ग्रामीण भागातील नागरिकांपर्यंत आरोग्य सुविधा पोहोचविणे आणि रुग्णसेवा हीच सर्वोच्च प्राधान्य मानून काम करण्यावर विशेष भर देण्यात आला. तसेच सर्व वैद्यकीय यंत्रणांनी अधिक संवेदनशीलतेने आणि तत्परतेने कार्य करण्याचे आवाहन करण्यात आले.
