रिसोड (प्रतिनिधी): शहरातील मोकाट व आक्रमक कुत्र्यांच्या वाढत्या उपद्रवाबाबत नगरसेवक बंडुभाऊ वानखेड़े यांनी नगरपरिषद प्रशासनाला निवेदन देत तातडीने उपाययोजना करण्याची मागणी केली आहे.
रिसोड शहरात गेल्या काही दिवसांपासून मोकाट कुत्र्यांचा उपद्रव मोठ्या प्रमाणात वाढत असून नागरिकांच्या सुरक्षिततेचा गंभीर प्रश्न निर्माण झाला आहे. विशेष म्हणजे, गेल्या एका महिन्यात अनेक नागरिकांना कुत्र्यांनी चावा घेतल्याच्या घटना समोर आल्या आहेत. यामुळे नागरिकांमध्ये भीतीचे वातावरण पसरले असून प्रशासनाच्या दुर्लक्षामुळे जीवितास धोका निर्माण होत असल्याचा आरोप करण्यात आला आहे.
नगरसेवक वानखेड़े यांनी दिलेल्या निवेदनात प्रशासनाने तातडीने पुढील उपाययोजना कराव्यात, अशी मागणी केली आहे:
- शहरातील मोकाट कुत्र्यांना पकडून त्यांचे निर्बीजिकरण व लसीकरण करणे
- आक्रमक व आजारी कुत्र्यांना वेगळे करून आवश्यक कार्यवाही करणे
- नागरिकांच्या तक्रारींसाठी विशेष हेल्पलाईन सुरू करणे
- या समस्येवर कायमस्वरूपी नियंत्रणासाठी ठोस योजना राबविणे
दरम्यान, या मागण्यांकडे तातडीने लक्ष न दिल्यास नागरिकांच्या वतीने तीव्र आंदोलन छेडण्यात येईल, असा इशाराही निवेदनात देण्यात आला आहे.
