पहाडपट्टीतील दुर्गम भागातील गरजू कुटुंबांसोबत तरुणांची दिवाळी; पद, प्रसिद्धी आणि मान-सन्मानापेक्षा सेवाभावाला प्राधान्य
शहादा, प्रतिनिधी : दिवाळी म्हणजे आनंदाचा, प्रकाशाचा आणि उत्साहाचा सण. मात्र, हाच आनंद समाजातील शेवटच्या घटकापर्यंत पोहोचविण्याचे मोलाचे काम शहाद्यातील ‘समर्पण ग्रुप’ गेल्या अनेक वर्षांपासून निष्ठेने आणि समर्पित भावनेने करत आहे. स्वतःच्या आनंदातील काही क्षण गरजू कुटुंबांसोबत घालवून त्यांच्या जीवनात आनंदाचा प्रकाश निर्माण करणाऱ्या या तरुणांचा उपक्रम समाजासमोर माणुसकीचा सुंदर आदर्श ठेवणारा ठरत आहे.
शहादा शहरातील विविध क्षेत्रांत कार्यरत असलेले, तसेच नोकरी आणि व्यवसायानिमित्त वेगवेगळ्या शहरांमध्ये स्थायिक झालेले सुशिक्षित तरुण एकत्र येऊन या ग्रुपच्या माध्यमातून सामाजिक सेवेचा अनोखा पायंडा पाडत आहेत. दिवाळीच्या निमित्ताने पहाडपट्टीतील दुर्गम भागात राहणाऱ्या गरीब व गरजू कुटुंबांमधील लहान मुलांसोबत दिवाळी साजरी करण्याचा त्यांचा उपक्रम विशेष कौतुकास्पद आहे.
लोकसहभागातून मदत; तरुणांचा स्वखर्चाने सेवाप्रवास
समर्पण ग्रुपच्या माध्यमातून व्हॉट्सॲप ग्रुपद्वारे लोकसहभागातून निधी आणि विविध वस्तूंचे संकलन केले जाते. दिवाळीचा फराळ, फटाके, जीवनावश्यक वस्तू, शालेय साहित्य तसेच दैनंदिन जीवनासाठी आवश्यक असणाऱ्या वस्तू तरुण स्वतःच्या सहभागातून गोळा करतात. त्यानंतर स्वखर्चाने पहाडपट्टीतील दुर्गम भागात जाऊन गरजू कुटुंबांना मदतीचा हात देतात.
या उपक्रमातून गरजू कुटुंबांना आवश्यक वस्तू मिळतात, तर लहान मुलांच्या चेहऱ्यावर आनंद फुलतो. त्यांच्या आयुष्यात दिवाळीचा खरा प्रकाश पोहोचविण्याचे काम हे तरुण कोणत्याही अपेक्षेविना करतात. समाजातील वंचित घटकांनाही सणाचा आनंद घेता यावा, हीच या उपक्रमामागील प्रमुख भावना आहे.
ना अध्यक्ष, ना उपाध्यक्ष; सेवाभाव हाच एकमेव उद्देश
या ग्रुपचे सर्वांत मोठे वैशिष्ट्य म्हणजे येथे ना कोणी अध्यक्ष, ना उपाध्यक्ष आणि ना कोणी मोठा किंवा छोटा सदस्य! ग्रुपमध्ये कोणत्याही पदाला महत्त्व दिले जात नाही. प्रसिद्धीची अपेक्षा नाही किंवा मान-सन्मानाची लालसाही नाही. प्रत्येक सदस्य समान असून सर्वजण एका उदात्त सामाजिक ध्येयासाठी एकत्रितपणे काम करतात. कोणत्याही पदापेक्षा माणुसकी आणि सेवाभाव मोठा असतो, हे समर्पण ग्रुपच्या कार्यातून दिसून येते.
आजच्या धावपळीच्या आणि स्वार्थकेंद्रित होत चाललेल्या जगात स्वतःच्या सुखसोयी बाजूला ठेवून आपल्या आनंदातील काही क्षण आणि उत्पन्नातील काही हिस्सा गरजू बांधवांसाठी खर्च करणाऱ्या या तरुणांचे कौतुक करावे तेवढे कमीच आहे. कारण दिवाळी केवळ स्वतःच्या घरात दिवे लावून साजरी होत नाही, तर दुसऱ्याच्या आयुष्यात आनंदाचा दिवा पेटवला जातो, तेव्हाच त्या दिवाळीला खरा अर्थ प्राप्त होतो.
समर्पण ग्रुपचा हा उपक्रम केवळ दिवाळी साजरी करण्यापुरता मर्यादित नसून माणुसकी जपण्याचा, सामाजिक एकोपा वाढविण्याचा आणि नव्या पिढीसमोर सेवाभावाचा आदर्श ठेवण्याचा सुंदर प्रयत्न आहे. कोणतीही अपेक्षा न ठेवता समाजासाठी कार्य करणाऱ्या या सुशिक्षित, संवेदनशील आणि समाजभान जपणाऱ्या तरुणांचे कार्य निश्चितच प्रेरणादायी असून त्यांच्या सेवाभावी वृत्तीला मनापासून सलाम!
