धोंदलगाव (प्रतिनिधी – नाना साबळे): वैजापूर येथील अॅड. नितीन रायभान बोराडे यांना नैसर्गिक मानवाधिकार सुरक्षा परिषद फोरम यांच्या वतीने ‘राज्यस्तरीय समाज भूषण पुरस्कार २०२६’ जाहीर झाला आहे. सामाजिक, शैक्षणिक व कौटुंबिक समुपदेशन क्षेत्रातील उल्लेखनीय कार्याची दखल घेऊन हा सन्मान प्रदान करण्यात आला आहे.
अत्यंत प्रतिकूल परिस्थितीत शिक्षण पूर्ण करून वकिली व्यवसायात स्थिरावताना अॅड. बोराडे यांनी सामाजिक बांधिलकीही जपली आहे. न्यायालयीन वादांमध्ये तणावग्रस्त पती-पत्नींना समुपदेशनाद्वारे एकत्र आणून त्यांनी अनेक तुटणारे संसार पुन्हा उभे केले आहेत. मुलांचे भविष्य सुरक्षित राहावे या हेतूने त्यांनी दिलेले मार्गदर्शन मोलाचे ठरत आहे.
🌟 समाजकारणासोबत शिक्षण क्षेत्रातही भरीव योगदान
ग्रामीण भागातील विद्यार्थ्यांना करिअरविषयक मार्गदर्शन करून उच्च शिक्षणासाठी प्रेरित करण्याचे कार्यही ते सातत्याने करत आहेत. विशेष म्हणजे, त्यांनी स्वतःच्या पत्नीला वकील बनवून तसेच घरातील महिलांच्या शिक्षणासाठी पुढाकार घेऊन स्त्री-शिक्षणाचा आदर्श समाजासमोर ठेवला आहे.
🏆 पुरस्कार वितरण सोहळा
हा पुरस्कार दिनांक २२ मार्च २०२६ रोजी धुळे येथील कांकरीया भवन येथे पार पडलेल्या समारंभात प्रदान करण्यात आला. यावेळी संस्थेचे राष्ट्रीय अध्यक्ष गोरख दिलीप देवरे, उत्तर महाराष्ट्र अध्यक्ष प्रफुल्ल सीताराम पाटील, तसेच आमदार राघवेंद्र भदाणे आणि मंजुळाताई गावित यांच्यासह विविध मान्यवर उपस्थित होते.
प्रतिकूल परिस्थितीशी झुंज देत यशाचे शिखर गाठणाऱ्या अॅड. नितीन बोराडे यांच्या या यशाबद्दल वैजापूर परिसरात सर्व स्तरांतून त्यांचे अभिनंदन करण्यात येत आहे.
