पाथरी (प्रतिनिधी) : पाथरी येथील “अजिंठा आर्ट” या शिल्पकला संस्थेचे ज्येष्ठ शिल्पकार प्रकाश दाढेल यांना शासनाच्या लोककलावंत मानधन योजनेपासून वंचित ठेवण्यात आल्याचा प्रकार समोर आला आहे. गेल्या सुमारे २५ वर्षांपासून दगडी शिल्पकलेच्या माध्यमातून सामाजिक व सांस्कृतिक क्षेत्रात मोलाचे योगदान देऊनही त्यांना अद्याप मानधन मिळाले नसल्याने नाराजी व्यक्त होत आहे.
प्रकाश दाढेल यांनी डॉ. बाबासाहेब आंबेडकर, अण्णाभाऊ साठे, छत्रपती शिवाजी महाराज, लहुजी साळवे आणि गौतम बुद्ध यांसारख्या महापुरुषांच्या तसेच हनुमान, गणपती, महादेव, नंदी, दत्तात्रय, लक्ष्मी, महाकाली आदी देवदेवतांच्या काळ्या पाषाणातील आकर्षक व जिवंत भासणाऱ्या मूर्ती घडवल्या आहेत. त्यांच्या शिल्पांमधून सौंदर्याबरोबरच सामाजिक संदेश व प्रबोधनाची झलकही दिसून येते.
ते दरवर्षी समाजकल्याण विभागामार्फत लोककलावंत मानधनासाठी ऑनलाईन अर्ज सादर करत असून अनेक वेळा संबंधित अधिकाऱ्यांकडे पाठपुरावा केला आहे. मात्र, प्रशासकीय दिरंगाईमुळे अद्याप कोणतीही ठोस कार्यवाही झालेली नसल्याचे त्यांनी सांगितले. त्यामुळे त्यांच्या कलेचा योग्य सन्मान होत नसल्याची भावना त्यांनी व्यक्त केली आहे.
शासनाकडून नृत्य, शिल्पकला, चित्रकला, लोकगीत आदी विविध कलाक्षेत्रांतील कलाकारांना मानधन व सन्मान दिला जात असला, तरी पारंपरिक शिल्पकलेत आयुष्य घालवणाऱ्या कलाकारांकडे दुर्लक्ष होत असल्याची खंतही त्यांनी व्यक्त केली.
प्रमुख मागण्या :
- लोककलावंत मानधन तात्काळ मंजूर करण्यात यावे
- अर्ज प्रक्रियेतील अनावश्यक विलंब टाळावा
- पारंपरिक शिल्पकारांना विशेष प्राधान्य देण्यात यावे
- नोंदणी व पडताळणी प्रक्रिया सुलभ व पारदर्शक करावी
शिल्पकार प्रकाश दाढेल यांच्यासारख्या पारंपरिक कलेचा वारसा जपणाऱ्या कलाकारांना शासनाने न्याय देत त्यांचा सन्मान राखावा, अशी अपेक्षा स्थानिक नागरिकांमधून व्यक्त होत आहे.
