शहादा (प्रतिनिधी) : नंदुरबार जिल्ह्यातील मंदाणा (ता. शहादा) येथे दिव्यांग बांधव व भगिनींसाठी विशेष नोंदणी व मार्गदर्शन शिबिराचे यशस्वी आयोजन करण्यात आले. या शिबिरात ५० अर्जांची नोंदणी करण्यात आली असून ई-केवायसी प्रक्रियेलाही उत्स्फूर्त प्रतिसाद मिळाला.
जिल्हाधिकारी डॉ. मित्ताली शेठी यांच्या दूरदृष्टीकोनातून आणि दिव्यांग सक्षमीकरण अधिकारी नंदकिशोर सूर्यवंशी यांच्या मार्गदर्शनाखाली २४ मार्च रोजी हे शिबिर पार पडले.
मनुदेवी फाउंडेशनच्या जिल्हा दिव्यांग पुनर्वसन केंद्र आणि राष्ट्रीय दिव्यांग विकास महासंघ (महाराष्ट्र राज्य) यांच्या संयुक्त विद्यमाने शिबिराचे आयोजन करण्यात आले. कार्यक्रमाची सुरुवात हेलन केलर आणि लुईस ब्रेल यांच्या प्रतिमापूजनाने करण्यात आली.
शिबिरामध्ये दिव्यांग बांधवांच्या तांत्रिक अडचणी दूर करण्यासाठी विविध उपक्रम राबविण्यात आले. यामध्ये एकूण ५० लाभार्थ्यांचे अर्ज भरून घेण्यात आले. तसेच लालसिंग पावरा यांच्या सहकार्याने २० जणांचे ई-केवायसी पूर्ण करण्यात आले. ९ नवीन यूडीआयडी कार्डांसाठी अर्ज सादर करण्यात आले, ९ कार्डांना आधार लिंक करण्यात आले, तर ३ जन्मतारखा दुरुस्तीची कामे पूर्ण करण्यात आली.
या प्रसंगी राज्य उपाध्यक्ष शिवाजीराव मोरे यांनी मार्गदर्शन करताना, “जिल्ह्यातील प्रत्येक दिव्यांग व्यक्तीपर्यंत शासनाच्या योजना पोहोचाव्यात आणि कोणालाही तांत्रिक अडचणींमुळे लाभापासून वंचित राहावे लागू नये, हाच या शिबिराचा उद्देश आहे,” असे सांगितले.
कार्यक्रमाला सरपंच सुशिलाबाई पवार, उपसरपंच शरद साळुंखे, ग्रामसेवक दिनेश पाटील, जिल्हाध्यक्ष राजाभाऊ कुवर, सुनिताताई कुवर, जयश्री जाधव, धरमसिंग पावरा, राजेंद्र खर्डे यांच्यासह ग्रामपंचायत सदस्य व ग्रामस्थ मोठ्या संख्येने उपस्थित होते.
शिबिरादरम्यान नागरिकांसाठी चहा, नाश्ता व पाण्याची उत्तम व्यवस्था करण्यात आली होती. शिस्तबद्ध पद्धतीने पार पडलेल्या या उपक्रमाबद्दल मंदाणा परिसरातील दिव्यांग बांधवांनी समाधान व्यक्त करत आयोजकांचे आभार मानले.
