सांगोला (प्रतिनिधी) : सोलापूर जिल्ह्यातील मौजे चिंकी (चिनके) येथे श्री सिद्धनाथ यात्रेनिमित्त आयोजित उत्सव मोठ्या उत्साहात आणि भक्तीभावाने पार पडला. यात्रेला भाविकांनी मोठ्या संख्येने उपस्थित राहून कार्यक्रमांना उत्स्फूर्त प्रतिसाद दिला.
यात्रेनिमित्त विविध धार्मिक कार्यक्रमांसह ग्रामस्थांनी भाविकांचे स्वागत केले. कार्यक्रमाचे संयोजन जालिंदर प्रल्हाद मिसाळ यांनी केले, तर आभार प्रदर्शन बाबासाहेब मिसाळ यांनी मानले. बाळासाहेब मिसाळ यांनीही भाविकांचे स्वागत करत उपस्थितांचे आभार मानले.
या यात्रेनिमित्त उद्या भव्य निकाली कुस्ती स्पर्धेचे आयोजन करण्यात आले असून विजेत्या पैलवानाला १ लाख रुपयांचे आकर्षक बक्षीस देण्यात येणार आहे. हे बक्षीस युवा उद्योजक संतोष भैया मिसाळ (पुणे) यांच्या वतीने देण्यात येणार असल्याची माहिती देण्यात आली आहे.
तसेच यात्रेनिमित्त सायंकाळी सांस्कृतिक कार्यक्रमांचीही मेजवानी ठेवण्यात आली आहे. लावण्यखणी तसेच जया सदाफुले (पुणे) यांच्या कार्यक्रमांचे आयोजन करण्यात आले असून, या कार्यक्रमांमुळे यात्रेचा उत्साह आणखी वाढणार आहे.
एकूणच, श्री सिद्धनाथ यात्रेमुळे परिसरात भक्ती, परंपरा आणि सांस्कृतिक उत्साहाचे वातावरण निर्माण झाले असून ग्रामस्थ आणि भाविकांकडून या उपक्रमाचे स्वागत करण्यात येत आहे.
