दक्षिण सोलापूर (प्रतिनिधी) : तालुक्यातील आहेरवाडी येथे श्रीमद रंभापुरी पीठाच्या शाखा मठात नूतन उत्तराधिकारी म्हणून अभिनव शिवानंद देवरू यांची नियुक्ती करण्यात आली. विविध धार्मिक विधी, मंत्रोच्चार आणि संतांच्या सान्निध्यात त्यांचा भव्य पट्टाभिषेक सोहळा मोठ्या उत्साहात पार पडला.
वीरशैव लिंगायत समाजाच्या पंचपीठांपैकी एक असलेल्या श्रीमद रंभापुरी पीठाचा शाखा मठ आहेरवाडी येथे असून, या मठाची स्थापना शेकडो वर्षांपूर्वी झालेली आहे. येथील मठाधिपती म्हणून कार्यरत असलेले श्री ष.ब्र. रेवणसिद्ध शिवाचार्य महास्वामीजी यांनी आपल्या कार्यकाळात धर्मप्रसारासह समाजाला सदमार्ग दाखविण्याचे कार्य केले. नुकतेच त्यांच्या लिंगैक्यानंतर उत्तराधिकारी निवडीची प्रक्रिया पार पडली.
श्रीमद रंभापुरी जगद्गुरूंच्या आदेशानुसार विविध मठांच्या शिवाचार्यांच्या उपस्थितीत अभिनव शिवानंद देवरू यांचा पट्टाभिषेक सोहळा संपन्न झाला. यावेळी देवापूर (जि. कलबुर्गी) येथील मठाधिपती श्री शिवमूर्ती शिवाचार्य महास्वामीजी यांनी नूतन उत्तराधिकाऱ्यांना धर्मोपदेश केला.
या सोहळ्यास तरडगीचे श्री रेवणसिद्ध शिवाचार्य महास्वामीजी, मादनहिप्परगाचे शांतवीर शिवाचार्य महास्वामीजी, चौदापूरचे श्री राजशेखर शिवाचार्य महास्वामीजी, औरादचे मरुळसिद्ध शिवाचार्य महास्वामीजी, तोनसहनहळ्ळीचे रेवणसिद्ध चेरतेश्वर शिवाचार्य महास्वामीजी, श्रीनिवास सरडगीचे श्री रेवणसिद्ध शिवाचार्य महास्वामीजी आदी संत-महंतांचे दिव्य सान्निध्य लाभले.
यावेळी अभिनव शिवानंद देवरू यांचे “श्री ष.ब्र. १००८ अभिनव शिवानंद शिवाचार्य महास्वामीजी” असे नामकरण करण्यात आले.
सोहळ्यानंतर सायंकाळी नूतन पट्टाधिकाऱ्यांची अड्डपालखी गावातून काढण्यात आली. ग्रामस्थ व महिलांनी ठिकठिकाणी पालखीचे स्वागत करून दर्शन घेतले. या सोहळ्यास आहेरवाडी, कुभारी, बंकलगी, करजगी आदी गावांसह पंचक्रोशीतील भाविक मोठ्या संख्येने उपस्थित होते.
