शहादा, दि. ०४ (प्रतिनिधी) : भारतरत्न डॉ. बाबासाहेब आंबेडकर यांच्या १३५ व्या जयंतीचे औचित्य साधून शहादा येथील संभाजीनगर परिसरात विविध गुणदर्शन स्पर्धांचे भव्य आयोजन करण्यात आले आहे. प्रशिक बुद्धविहार, प्रज्ञा प्रतिष्ठान आणि डॉ. बाबासाहेब आंबेडकर जयंती उत्सव समिती यांच्या संयुक्त विद्यमाने या स्पर्धा ९ ते १२ एप्रिल २०२६ या कालावधीत पार पडणार आहेत.
या अंतर्गत वक्तृत्व, गायन, निबंध व नृत्य स्पर्धांचे आयोजन करण्यात आले असून ५ ते १८ वयोगटातील स्पर्धकांना सहभागी होता येणार आहे. वक्तृत्व स्पर्धा ९ एप्रिल रोजी रात्री ८ वाजता, गायन स्पर्धा १० एप्रिल रोजी, निबंध स्पर्धा ११ एप्रिल रोजी दुपारी १ ते ३ या वेळेत तर नृत्य स्पर्धा १२ एप्रिल रोजी रात्री ७ वाजता होणार आहे.
स्पर्धेसाठी १० रुपये नाममात्र प्रवेश शुल्क ठेवण्यात आले असून प्रवेश अर्ज ७ एप्रिल २०२६ पर्यंत आधारकार्डसह जमा करणे आवश्यक आहे. सर्व विजेत्यांना रोख रक्कम व वस्तूरूप बक्षिसे देण्यात येणार असून सर्व सहभागी स्पर्धकांना प्रोत्साहनपर बक्षीस दिले जाणार आहे.
बक्षीस वितरण सोहळा १ मे २०२६ रोजी रात्री ७ वाजता होणार आहे. या उपक्रमाच्या यशस्वीतेसाठी आयोजक समितीचे पदाधिकारी व कार्यकर्ते परिश्रम घेत आहेत. इच्छुकांनी आपले अर्ज ‘प्रज्ञा सप्लायर्स अँड जनरल स्टोअर्स’, शहादा येथे जमा करावेत, असे आवाहन करण्यात आले आहे.
