सिंधुदुर्ग, दि. ०४ एप्रिल २०२६ (प्रतिनिधी) : ओरोस येथील पालकमंत्री संपर्क कार्यालयात सिंधुदुर्गवासीयांशी संवाद साधत त्यांच्या विविध समस्या व निवेदनांचा आढावा घेण्यात आला. “जनतेच्या गाठीभेटी” उपक्रमांतर्गत नागरिकांच्या अडचणी थेट ऐकून संबंधित प्रश्नांवर तातडीने उपाययोजना करण्याचे निर्देश देण्यात आले.
या वेळी शिक्षकांच्या संचमान्यतेचा विषय मंत्रालयातील बैठकीतील निर्णयानुसार मार्गी लावला जाईल, असे सांगण्यात आले. तसेच शक्तिपीठ महामार्गाबाबत नागरिकांना विश्वासात घेऊन पुढील कार्यवाही केली जाईल, असेही स्पष्ट करण्यात आले. शिक्षकांच्या जुनी पेन्शन योजनेचा प्रश्न सोडविण्यासाठी जिल्हा परिषद मुख्य कार्यकारी अधिकाऱ्यांना आवश्यक निर्देश देण्यात आले.
कार्यालयात मोठ्या संख्येने नागरिकांनी विविध निवेदने सादर केली असून त्यांच्या समस्या सोडविण्यासाठी संबंधित अधिकाऱ्यांना तातडीने कार्यवाहीचे आदेश देण्यात आले, अशी माहिती देण्यात आली.
