चिंचवड :
महाराष्ट्र शासनाच्या आदिवासी विकास विभाग आणि एकात्मिक आदिवासी विकास प्रकल्प, घोडेगाव (ता. आंबेगाव) यांच्या वतीने आयोजित करण्यात आलेल्या ‘स्ट्रॉबेरी महोत्सवा’त मापोली गावातील शेतकऱ्यांनी आपल्या उत्पादनांचा ठसा उमटवला आहे. चिंचवड येथील एल्प्रो सिटी स्क्वेअर मॉलमध्ये सुरू असलेल्या या महोत्सवात ‘कमलाजा माता’ गट पर्यटकांचे मुख्य आकर्षण ठरत आहे.
मापोली गावातील प्रगतशील शेतकरी रामचंद्र मारुती लोहकरे आणि दत्तात्रेय भिवसेन लोहकरे या लोहकरे बंधूंनी आपल्या स्टॉलद्वारे स्ट्रॉबेरी शेतीतील नाविन्यपूर्ण प्रयोग सादर केला. त्यांनी ताजी स्ट्रॉबेरीसह स्ट्रॉबेरीपासून तयार केलेले विविध प्रक्रियायुक्त पदार्थ विक्रीसाठी ठेवले असून, ग्राहकांना ‘फार्म टू फोर्क’ या संकल्पनेचा अनुभव दिला.
या स्टॉलवरील प्रक्रियायुक्त उत्पादनांना ग्राहकांकडून उत्स्फूर्त प्रतिसाद मिळत असून, लोहकरे बंधूंच्या स्ट्रॉबेरीची चांगलीच चर्चा रंगली आहे. मापोली पंचक्रोशीतही त्यांच्या या यशाचे कौतुक होत आहे.
आदिवासी शेतकऱ्यांना त्यांच्या उत्पादनांना योग्य बाजारपेठ मिळावी आणि त्यांच्या मेहनतीला योग्य मोबदला मिळावा या उद्देशाने घोडेगाव प्रकल्पाच्या वतीने या महोत्सवाचे आयोजन करण्यात आले आहे.
