धाराशिव (प्रतिनिधी) :
धाराशिव तालुक्यातील मौजे बेंबळी परिसरात महसूल विभागाने केलेल्या अचानक तपासणीत दोन हॉटेल्समध्ये घरगुती गॅस सिलेंडरचा व्यावसायिक वापर होत असल्याचा प्रकार उघडकीस आला आहे. या प्रकरणी संबंधित दोघांविरुद्ध बेंबळी पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, दिनांक २८ मार्च २०२६ रोजी दुपारी सुमारे १२.३० वाजता तहसील कार्यालय धाराशिव येथील अधिकाऱ्यांनी बेंबळी येथील उजनी-बेंबळी रोडवरील ‘हॉटेल संगम’ आणि ‘हॉटेल मातोश्री’ येथे अचानक तपासणी केली. या तपासणीत दोन्ही ठिकाणी घरगुती वापरासाठी असलेले गॅस सिलेंडर व्यावसायिक कारणासाठी वापरले जात असल्याचे आढळून आले.
तपासणीदरम्यान संबंधित हॉटेल चालकांकडे व्यावसायिक वापरासाठी आवश्यक परवानगी नसल्याचे स्पष्ट झाल्याने अधिकाऱ्यांनी तात्काळ कारवाई केली. संबंधितांविरुद्ध आवश्यक वस्तू अधिनियम १९५५ अंतर्गत गुन्हा दाखल करण्यात आला आहे.
या कारवाईदरम्यान दोन गॅस सिलेंडर जप्त करण्यात आले असून ते बेंबळी पोलीस ठाण्यात जमा करण्यात आले आहेत. या प्रकरणाचा पुढील तपास सुरू असल्याची माहिती प्रशासनाकडून देण्यात आली आहे.
दरम्यान, या कारवाईमुळे बेकायदेशीरपणे घरगुती गॅसचा व्यावसायिक वापर करणाऱ्यांमध्ये खळबळ उडाली असून, अशा प्रकारांवर कठोर कारवाई करण्याचा इशारा प्रशासनाने दिला आहे.
