पालखी व रथातून देवांची गावातून मिरवणूक; बैलगाडा शर्यत, कुस्तीचे मैदान, लोकनाट्य तमाशा आणि अखंड हरिनाम सप्ताहाचे आयोजन
निमसोड | प्रतिनिधी :
सातारा जिल्ह्यातील खटाव तालुक्यातील निमसोड येथे ग्रामदैवत सिद्धनाथ व जोगेश्वरी देवीची पारंपरिक यात्रा मोठ्या उत्साहात साजरी करण्यात येणार आहे. या यात्रेनिमित्त भव्य रथोत्सवाचे आयोजन करण्यात आले असून, सिद्धनाथ व जोगेश्वरी देवांच्या पालखीची तसेच रथातून गावातून भव्य मिरवणूक काढण्यात येणार आहे.
या यात्रेला महाराष्ट्रातील विविध भागांसह परराज्यांत व्यवसाय व कामानिमित्त स्थायिक झालेले गलाई बांधव तसेच निमसोड परिसरातील भाविक आवर्जून उपस्थित राहतात. आपल्या ग्रामदैवताच्या दर्शनासाठी आणि यात्रेचा आनंद घेण्यासाठी अनेकजण दरवर्षी गावी येत असतात. त्यामुळे यात्रेला विशेष महत्त्व प्राप्त झाले आहे.
यात्रेनिमित्त ग्रामस्थ मंडळाच्या वतीने दोन ते तीन दिवस विविध धार्मिक, सांस्कृतिक आणि मनोरंजनात्मक कार्यक्रमांचे आयोजन करण्यात येते. यामध्ये बैलगाडा शर्यत, कुस्तीचे जंगी मैदान, कमल-वनिता कराडकर लोकनाट्य तमाशा मंडळाचा कार्यक्रम, लावणी कार्यक्रम, अखंड हरिनाम सप्ताह आणि काल्याचे कीर्तन अशा कार्यक्रमांचा समावेश आहे.
सिद्धनाथ व जोगेश्वरी देवांची पालखी आणि रथातून निघणारी भव्य मिरवणूक हे यात्रेचे मुख्य आकर्षण ठरणार आहे. दूरवरून तसेच परिसरातील गावांतून येणारे भाविक देवदर्शनासाठी गर्दी करतात. अनेक भाविक देवाच्या चरणी श्रद्धेनुसार रक्कम अर्पण करतात.
यात्रेच्या काळात मिठाई विक्रेते, खेळणी विक्रेते, आकाशपाळणे तसेच लहान मुलांच्या मनोरंजनासाठी विविध खेळांचे स्टॉल लावणारे व्यावसायिक मोठ्या संख्येने दाखल होतात. मात्र, सध्याच्या दुष्काळी परिस्थितीचा फटका या व्यावसायिकांनाही बसताना दिसत आहे. यात्रेतील गर्दी आणि व्यवसायावर त्याचा परिणाम जाणवत असल्याचे चित्र आहे.
धार्मिक श्रद्धा, परंपरा आणि सांस्कृतिक वारसा जपणारी सिद्धनाथ व जोगेश्वरी यात्रा निमसोडकरांसाठी विशेष महत्त्वाची मानली जाते. ग्रामस्थ मंडळ आणि ग्रामस्थांच्या सहकार्याने यात्रेचे नियोजन करण्यात येत असून, भाविकांनी मोठ्या संख्येने उपस्थित राहून यात्रेचा लाभ घ्यावा, असे आवाहन करण्यात येत आहे.









