वैजापूर | प्रतिनिधी :
वैजापूर तालुक्यातील पावन गोदातीरी वसलेल्या श्रीक्षेत्र राम दरबार आश्रम, बाजाठाण येथे रामनवमी, एकादशी तसेच विशाल हिंदू संमेलनाचा भव्य सोहळा भक्तीमय वातावरणात उत्साहात पार पडला. सालाबादप्रमाणे आयोजित या उत्सवाला भाविकांचा मोठा प्रतिसाद लाभला.
या सोहळ्यास श्रीक्षेत्र गोदाधामचे महंत गुरुवर्य ह.भ.प. रामगिरीजी महाराज यांनी भेट देत उपस्थितांना मार्गदर्शन केले. तसेच सरला बेटाचे विश्वस्त ह.भ.प. मधुकर महाराज यांचीही प्रमुख उपस्थिती होती. श्रीक्षेत्र सरला बेटाच्या परंपरेनुसार परमपूज्य गुरुवर्य ह.भ.प. प्रेममूर्ती हरिशरण गिरीजी महाराज यांच्या आशीर्वादातून राम दरबारची वाटचाल अखंड रामनामाच्या महाकुंभाकडे सुरू असल्याचे यावेळी सांगण्यात आले.
उत्सवाच्या निमित्ताने रामनाम जप, एकादशी कीर्तन, वार्षिक सप्ताह आणि अन्नदान यांसारखे विविध धार्मिक उपक्रम पार पडले. कीर्तन सेवा ह.भ.प. सुवर्णाताई यांनी सादर केली. रमणीय परिसरात झालेल्या या कार्यक्रमात तरुण वर्गाची उपस्थिती विशेष लक्षणीय ठरली.
या वेळी आयोजित हिंदू संमेलनात महाराष्ट्र गोसेवा आयोगाचे सदस्य मनीष वर्मा यांनी ‘पंचपरिवर्तन’ या विषयावर सखोल मार्गदर्शन केले. तसेच राष्ट्रीय स्वयंसेवक संघाचे स्वयंसेवक, विविध आश्रमांचे महाराज व मान्यवर मोठ्या संख्येने उपस्थित होते.
कार्यक्रमास जिल्हा परिषद भाजपचे नवनिर्वाचित जिल्हाध्यक्ष अविनाश पाटील गलांडे, डॉ. गोकुळ चामे, पंडित अण्णा शिंदे, विरगाव पोलीस स्टेशनचे पीआय शंकर वाघमोडे यांच्यासह विविध क्षेत्रातील मान्यवरांनी उपस्थिती लावली.
या धार्मिक सोहळ्याला हजारो भाविकांनी उपस्थित राहून महाअन्नदानाचा लाभ घेतला. अखेरीस सर्व मान्यवरांचे आभार मानत अन्नदानाने कार्यक्रमाची सांगता करण्यात आली.
