कुंडलवाडी (प्रतिनिधी):
नगराध्यक्षा सौ. प्रेरणाताई गजानन कोटलावार यांच्या पुढाकारातून कुंडलवाडी नगर परिषद हद्दीत प्रधानमंत्री आवास योजना (शहरी) २.० अंतर्गत ४९ लाभार्थ्यांना घरकुलाचा पहिला हफ्ता वितरित करण्यात आला. दि. ६ एप्रिल २०२६ रोजी नगर परिषद कार्यालयात झालेल्या या कार्यक्रमात प्रत्येक लाभार्थ्यास एक लाख रुपयांचा निधी देण्यात आला.
हा निधी केंद्र व राज्य शासनाच्या संयुक्त माध्यमातून देण्यात आला असून, या योजनेमुळे सर्वसामान्य नागरिकांच्या हक्काच्या घराचे स्वप्न पूर्ण होण्यास मोठी मदत होत आहे.
यावेळी नगराध्यक्षा सौ. कोटलावार यांनी माहिती देताना सांगितले की, प्रधानमंत्री आवास योजना (शहरी) २.० अंतर्गत कुंडलवाडीत आणखी ११४ नवीन घरकुलांना केंद्र शासनाची मंजुरी मिळाली आहे. त्यामुळे शहरातील अधिकाधिक गरजू कुटुंबांना या योजनेचा लाभ मिळणार आहे.
तसेच, आतापर्यंत ऑनलाइन नोंदणी करून मंजूर झालेल्या २२० लाभार्थ्यांना नगर परिषदेकडून आवाहन करण्यात आले आहे की, त्यांनी आवश्यक बांधकाम परवानगी घेऊन तातडीने घरबांधणीस सुरुवात करावी आणि पहिला हफ्ता मिळविण्यासाठी अर्ज सादर करावा.
नवीन इच्छुक लाभार्थ्यांनी अधिकृत पोर्टलवर नोंदणी करून आवश्यक कागदपत्रांसह अर्ज नगर परिषद कार्यालयात सादर करावा, असेही आवाहन करण्यात आले आहे. अधिक माहितीसाठी प्रधानमंत्री आवास योजना कक्ष, नगर परिषद कुंडलवाडी येथे संपर्क साधण्याचे सांगण्यात आले.
या उपक्रमामुळे शहरातील सर्वसामान्य नागरिकांना घर मिळविण्याचा मार्ग अधिक सुलभ होत असल्याची भावना उपस्थितांकडून व्यक्त करण्यात आली.
