अहमदपूर (प्रतिनिधी):
लातूर जिल्हा परिषदेचे मुख्य कार्यकारी अधिकारी राहुल कुमार मिना यांच्या संकल्पनेतून किनगाव येथील प्राथमिक आरोग्य केंद्रात मेंदूविकार असलेल्या बालकांसाठी मोफत तपासणी व औषधोपचार शिबिराचे आयोजन करण्यात आले. रविवार, दि. ५ एप्रिल २०२६ रोजी पार पडलेल्या या उपक्रमाला पालकांचा उत्स्फूर्त प्रतिसाद लाभला.
जिल्हा परिषदेच्या ५ टक्के दिव्यांग राखीव निधीतून (२०२५-२६) राबवण्यात आलेल्या या शिबिरात एकूण ७५ बालकांची तज्ज्ञ डॉक्टरांकडून तपासणी करण्यात आली. यावेळी रुग्णांना एक महिन्याचे औषध जागीच देण्यात आले असून, पुढील दोन महिन्यांची औषधे घरपोच देण्यात येणार आहेत. अशा प्रकारे तीन महिन्यांचा संपूर्ण उपचार मोफत उपलब्ध करून देण्यात येत आहे.
आरोग्य विभाग, दिव्यांग सक्षमीकरण विभाग, जिल्हा परिषद लातूर आणि जिल्हा दिव्यांग पुनर्वसन केंद्र यांच्या संयुक्त विद्यमाने हा उपक्रम राबविण्यात आला.
या शिबिरास जिल्हा परिषद सदस्य प्रतीक्षा भागवत गुट्टे, उपसरपंच विठ्ठलराव बोडखे, माजी जिल्हा परिषद सदस्य त्रिंबक आबा गुट्टे, तालुका आरोग्य अधिकारी डॉ. गणेश जाधव, वैद्यकीय अधिकारी डॉ. विठ्ठल घुले, मेंदूविकार तज्ज्ञ डॉ. रुईकर, डॉ. उगिले, बसवराज पैकी तसेच सामाजिक कार्यकर्ते भागवत गुट्टे आदी मान्यवर उपस्थित होते.
ग्रामीण भागातील दिव्यांग बालकांना तज्ज्ञ उपचार सहज उपलब्ध व्हावेत या उद्देशाने आयोजित या शिबिरामुळे गरजू कुटुंबांना मोठा दिलासा मिळाला आहे. जिल्हा परिषदेच्या या उपक्रमाचे सर्व स्तरातून कौतुक होत आहे.
