गेवराई तालुका | प्रतिनिधी :
गेवराई तालुक्यातील मारुतीचे (ठाकर) आडगांव येथे श्री हनुमान जन्मोत्सवानिमित्त दरवर्षीप्रमाणे यंदाही अखंड हरिनाम सप्ताह व ज्ञानेश्वरी पारायण सोहळ्याचे आयोजन श्री महारुद्र मंदिर परिसरात करण्यात आले आहे. हा धार्मिक सोहळा गेल्या सुमारे ७० वर्षांपासून अखंड परंपरेने सुरू असून ग्रामस्थ व तरुणांच्या पुढाकारातून उत्साहात साजरा केला जात आहे.
ह.भ.प. वै. काशिनाथ महाराज लिंबारुईकर यांच्या आशीर्वादाने तसेच ह.भ.प. वै. निवृत्ती महाराज काळे यांच्या प्रेरणेने हा सप्ताह आयोजित करण्यात आला आहे. दि. ३ ते १० एप्रिल या कालावधीत विविध कीर्तन सेवा व धार्मिक कार्यक्रमांचे आयोजन करण्यात आले आहे.
या सप्ताहात दररोज नामवंत कीर्तनकारांची कीर्तन सेवा होणार असून, यात ह.भ.प. लक्ष्मण महाराज खरात, महेश महाराज काटे, ज्ञानेश्वर महाराज माजलगांवकर, महंत नामदेव महाराज शेकटेकर, सत्यवाण महाराज लाटे, योगेश महाराज यादव, नाना महाराज कदम यांचा समावेश आहे.
दि. १० एप्रिल रोजी ह.भ.प. महंत विष्णू महाराज जगताप यांच्या अमृततुल्य वाणीतून काल्याचे कीर्तन होणार असून त्यानंतर महाप्रसादाचे आयोजन करण्यात आले आहे. श्री भागवत क्षीरसागर यांच्या हस्ते महाप्रसाद दिला जाणार आहे.
या धार्मिक सोहळ्यास परिसरातील भाविक भक्तांनी मोठ्या संख्येने उपस्थित राहून कीर्तन, पारायण आणि महाप्रसादाचा लाभ घ्यावा, असे आवाहन समस्त ग्रामस्थांनी केले आहे.
