सुरंगली जिल्हा परिषद शाळेत शैक्षणिक साहित्य लोकार्पण सोहळा उत्साहात

जालना जिल्हा ग्रामीण प्रतिनिधी : संजीव पाटील | भोकरदन

भोकरदन तालुक्यातील सुरंगली येथील जिल्हा परिषद शाळेत शैक्षणिक साहित्य लोकार्पण सोहळा मोठ्या उत्साहात पार पडला. राजुरेश्वर इन्फ्रास्ट्रक्चर प्रा. लि. यांच्या CSR निधीतून तसेच सह्याद्री शिक्षण प्रसारक मंडळाच्या वतीने सुमारे ४ लाख १९ हजार रुपयांचे साहित्य उपलब्ध करून देण्यात आले.

या उपक्रमाला आमदार संतोष दानवे यांच्या संकल्पनेची जोड लाभली असून, आशाताई मुकेश पांडे यांच्या प्रयत्नातून हा उपक्रम साकार झाला. त्यांच्या हस्ते तसेच गटविकास अधिकारी डॉ. श्रीकृष्ण वेणीकर आणि गटशिक्षणाधिकारी डॉ. भारत वानखेडे यांच्या उपस्थितीत साहित्याचे लोकार्पण करण्यात आले.

या साहित्यामध्ये १००० लिटरच्या दोन पाण्याच्या टाक्या, २४ लेझीम संच, ४ संगणक संच, ६५ इंची इंटरॅक्टिव्ह प्रोजेक्टर (कॅमेरासह) २ नग, तसेच ४३ इंची एलईडी टीव्ही ३ नगांचा समावेश आहे.

कार्यक्रमाची सुरुवात मान्यवरांच्या हस्ते दीपप्रज्वलन करून करण्यात आली. शाळा व्यवस्थापन समितीच्या वतीने उपस्थित मान्यवरांचे स्वागत करण्यात आले. प्रास्ताविक दीपक जाधव यांनी केले, तर आभार प्रदर्शन गिरी सर यांनी केले.

या कार्यक्रमास पंचायत विस्तार अधिकारी पाखरे, केंद्रप्रमुख सुभाष जंजाळ, मुख्याध्यापक सोनवणे, भाजप सोयगाव मंडळ अध्यक्ष दीपक सेठ जाधव, संजय वामनराव जाधव, माजी सरपंच संजीव पाटील, अंकुश जाधव, राहुल जाधव, शंकर जाधव, एकनाथ भराड यांच्यासह अनेक मान्यवर उपस्थित होते.

यावेळी मराठी व उर्दू माध्यमाच्या विद्यार्थ्यांसाठी नवीन शाळा खोल्यांची मागणी करण्यात आली. तसेच सुरंगली ते सुरंगली फाटा रस्ता सिमेंट काँक्रिट करण्याची मागणीही ग्रामस्थांनी केली असून, संबंधित कामे मार्गी लावण्याचे आश्वासन देण्यात आले.

दरम्यान, उपलब्ध जागा नसल्याच्या कारणावरून जिल्हा परिषद व उर्दू शाळेसाठी मंजूर झालेले किचन शेड परत गेल्याची खंत व्यक्त करण्यात आली.

अंगणवाडीला भेट देताना गटविकास अधिकारी डॉ. वेणीकर यांचा सत्कार अंगणवाडी सेविका मंदा सुरंगलीकर पाटील यांनी केला. तसेच शाळेला हे साहित्य दीपक जाधव यांच्या प्रयत्नातून मिळाल्याची माहिती मुख्याध्यापक अरुण बावस्कर यांनी दिली.