भोकरदन तालुका प्रतिनिधी : संजीव पाटील
भोकरदन शहरात गॅस सिलेंडर मिळवण्यासाठी नागरिकांना मोठ्या त्रासाला सामोरे जावे लागत असल्याचे चित्र समोर आले आहे. गॅस बुकिंगसाठी ऑनलाईन प्रणालीतील अडचणींमुळे नागरिकांना प्रत्यक्ष एजन्सीवर जाऊन लांबच लांब रांगा लावाव्या लागत आहेत.
आज गजानन भारत गॅस एजन्सी येथे सकाळपासूनच महिलांसह पुरुषांनी गर्दी केली होती. काही जण केवायसी प्रक्रियेसाठी, तर काही जण ऑनलाईन बुकिंग होत नसल्याने सिलेंडर मिळवण्यासाठी रांगेत उभे होते. उन्हाळ्याच्या कडक उन्हात नागरिकांना तासन्तास प्रतीक्षा करावी लागत असल्याचे दिसून आले.
मिळालेल्या माहितीनुसार, आर्थिक वर्षअखेर असल्याने सकाळी ऑनलाईन पोर्टल बंद होते. दुपारी १२ वाजल्यानंतर पोर्टल सुरू झाल्यानंतरच सिलेंडर वितरणाला सुरुवात झाली.
नागरिकांनी एजन्सीकडून योग्य मार्गदर्शन व सुविधा मिळाव्यात, यासाठी कर्मचारी संख्या वाढविण्याची मागणी केली आहे. प्रशिक्षित कर्मचाऱ्यांची नियुक्ती केल्यास रांगा कमी होतील आणि नागरिकांना उन्हात उभे राहण्याची वेळ येणार नाही, असे मत व्यक्त करण्यात येत आहे. तसेच उन्हापासून बचावासाठी सावलीची व्यवस्था करावी, अशीही मागणी करण्यात आली आहे.
दरम्यान, महसूल उपविभागीय अधिकारी व तहसीलदार यांनी प्रत्यक्ष भेट देऊन परिस्थितीची पाहणी करावी व गॅस एजन्सी चालकांना आवश्यक सूचना द्याव्यात, अशी मागणी नागरिकांकडून होत आहे.
