पंढरपूर (प्रतिनिधी):
पंढरपूर येथील रेल्वे मालधक्का परिसरात काम करणाऱ्या एका माथाडी कामगारावर रिक्षाचालक व त्याच्या साथीदाराकडून भरदिवसा मारहाण करण्यात आल्याची धक्कादायक घटना समोर आली आहे. या हल्ल्यात 21 वर्षीय आभिजीत आबासाहेब चव्हाण हा कामगार गंभीर जखमी झाला असून त्याच्या डोक्याला टाके पडले आहेत तसेच ओठाला गंभीर दुखापत झाली आहे.
मिळालेल्या माहितीनुसार, आभिजीत चव्हाण हा ग्रामीण भागातील आढीव गावातून उपजीविकेसाठी पंढरपूर येथे रेल्वे मालधक्क्यावर काम करतो. घटनेच्या दिवशी दुपारी सुमारे 3 वाजण्याच्या सुमारास तो पाणी आणण्यासाठी गेला असता, नशेत असलेल्या रिक्षाचालकाने व त्याच्या सहकाऱ्याने कोणतेही कारण नसताना त्याच्यावर हल्ला केला. पंढरपूर रेल्वे मैदान गेटसमोर ही घटना घडली असून आरोपींनी आपली दहशत निर्माण करण्याच्या उद्देशाने मारहाण केल्याचा आरोप आहे.
हल्ल्यानंतर आरोपी घटनास्थळावरून फरार झाले. या घटनेनंतर संतप्त माथाडी कामगारांनी एकत्र येत पंढरपूर शहर पोलीस ठाण्यात तक्रार दाखल केली. पोलिसांनी सीसीटीव्ही व व्हिडिओच्या आधारे तपास करत आरोपींची ओळख पटवली असून सोन्या वाघमारे (रा. भंटुबरे, ता. पंढरपूर) व दीपक बंद्दपटे (रा. जुना कराड नाका) अशी त्यांची नावे असल्याची माहिती पोलिस प्रशासनाकडून देण्यात आली आहे.
या प्रकरणी भारतीय न्याय संहिता (BNS) 2023 अंतर्गत कलम 118(1), 115(2), 352(3) व 5 नुसार गुन्हा दाखल करण्यात आला असून पुढील तपास पोलीस करीत आहेत.
दरम्यान, आरोपींना तात्काळ अटक करण्यात यावी, या मागणीसाठी माथाडी कामगारांनी काम बंदचा इशारा दिला असून, आरोपी अटकेपर्यंत काम बंद ठेवण्याचा पवित्रा त्यांनी घेतला आहे.
