केज (प्रतिनिधी):
केज तालुक्याचे तहसीलदार राकेश गिड्डे यांचे आज सकाळी झालेल्या भीषण कार अपघातात दुर्दैवी निधन झाले. लातूर-अंबाजोगाई महामार्ग वरील रेणापूर फाटा जवळ हा अपघात घडला.
मिळालेल्या प्राथमिक माहितीनुसार, राकेश गिड्डे हे स्वतःच्या कारने प्रवास करत असताना गाडीवरील नियंत्रण सुटल्याने वाहन पलटी झाले. अपघाताची तीव्रता इतकी मोठी होती की त्यांचा जागीच मृत्यू झाला. घटनेच्या वेळी ते कारमध्ये एकटेच असल्याचे सांगितले जात आहे.
घटनेची माहिती मिळताच स्थानिक पोलिसांनी तातडीने घटनास्थळी धाव घेतली. त्यानंतर मृतदेह उत्तरीय तपासणीसाठी ग्रामीण रुग्णालय, रेणापूर येथे पाठविण्यात आला आहे.
या दुर्दैवी घटनेमुळे महसूल प्रशासनासह संपूर्ण केज तालुक्यावर शोककळा पसरली आहे. एक कार्यक्षम आणि तरुण अधिकारी गमावल्याची भावना सर्वत्र व्यक्त होत असून या प्रकरणाचा पुढील तपास पोलीस करत आहेत.
