पैठण तालुका प्रतिनिधी :- प्रशांत भुमरे
बँक ऑफ महाराष्ट्रच्या पाचोड शाखेत परिसरातील जवळपास ४५ गावांतील ग्राहक जोडलेले आहेत. येथील उपशाखाधिकारी राम काळे यांच्यासह कर्मचाऱ्यांच्या अरेरावीस ग्राहक वैतागले आहेत. त्यांच्यावर कारवाई करावी, अशी मागणी शाखाधिकाऱ्यांकडे निवेदनाद्वारे करण्यात आली आहे.
बँकेत विविध कामांसाठी आलेल्या ग्राहकांना उपशाखाधिकारी, कर्मचारी हे व्यवस्थित उत्तरे देत नाहीत, अपमानास्पद वागणूक देतात. पैशाची तातडीने व्यवस्था न केल्यास जमीन व घराची जप्तीची नोटीस काढण्याची धमकी देत शेतकऱ्यावर दबाव टाकण्यात येत आहे. शेतकऱ्यांना सिबिलच्या
नावाखाली कर्ज नाकारण्याचे प्रमाण वाढले आहे. या बँकेत लहान कामांसाठीही उपशाखा अधिकारी ग्राहकांना ताटकळत ठेवतात. एका दिवसात होणाऱ्या कामांसाठी अनेकदा हेलपाटे मारावे लागतात.
इंटरनेट कनेक्टिव्हिटी आणि सर्व्हर डाऊन असल्याचे व कर्मचारी नसल्याचे कारण देत वेळ मारून नेतात. शेती कर्ज, शैक्षणिक कर्ज, मुद्रा लोन देण्यास तसेच पासबुकवर प्रिंट देण्यास टाळाटाळ करण्यात येत असल्याचा आरोप निवेदनात करण्यात आला आहे. निवेदन देताना केतन बडजाते, धनराज भुमरे, पारस अजमेरा, अनिस पटेल व शहादत सय्यद, सुरेश मापारी यांच्यासह व्यापारी, शेतकरी उपस्थित होते.
महाराष्ट्र बँकेच्या ग्राहक संख्येत घट
बैंक ऑफ महाराष्ट्रच्या पाचोड शाखेत गेल्या काही महिन्यांपासून मनमानी कारभार सुरू आहे. खातेधारकांकडून अवाजवी वसुली केली जात असल्याची ओरड आहे. तसेच बँकेत येणाऱ्या ग्राहकंना सौजन्याची वागणूक मिळत नाही. परिणामी या बँकेच्या ग्राहकांत घट होत चालली आहे.
- धनराज भुमरे, खातेदार
तक्रारीबाबत सदरील वरिष्ठ कार्यालयास कळविण्यात आले आहे. वरिष्ठ कार्यालयातील मार्गदर्शन आल्यानंतर या प्रकरणात योग्य ती कारवाई करण्यात येईल.
- परमेश्वर तांदळे, शाखा
व्यवस्थापक, महाराष्ट्र बैंक पाचोड
