मुंब्रा (प्रतिनिधी):
मुंब्रा पोलीस ठाण्याच्या हद्दीत आज सकाळी सुमारे 11.30 वाजण्याच्या सुमारास गोळीबाराची गंभीर घटना घडली. कैलास नगर परिसरातील सुमनताई चव्हाण हिंदी प्राथमिक विद्यालयाजवळील बिस्मिल्ला चाळ येथे हा प्रकार घडला.
मिळालेल्या माहितीनुसार, आरोपी जयन शिवानंदन नायर (वय 51) याने त्याची मानलेली बहीण अन्नू शेख हिला काही जणांकडून छेडछाड होत असल्याच्या कारणावरून वाद निर्माण झाला. या वादातून संतापलेल्या आरोपीने गोळीबार केला.
या गोळीबारात अब्दुल हसन शेख, अकबर अब्दुल शेख व समीर अहमद शेख हे तिघे गंभीर जखमी झाले. जखमींना तातडीने काळसेकर हॉस्पिटल येथे उपचारासाठी दाखल करण्यात आले. मात्र, उपचारादरम्यान अकबर अब्दुल शेख यांचा मृत्यू झाला.
घटनेनंतर आरोपी फरार झाला होता. मात्र पोलिसांनी तातडीने कारवाई करत आरोपीला गुन्ह्यात वापरलेल्या शस्त्रासह ताब्यात घेतले आहे.
या घटनेमुळे परिसरात तणावाचे वातावरण निर्माण झाले असून पोलीस पुढील तपास करत आहेत.
