तळोदा तालुक्यातील थेवापाणी येथे आजचा दिवसही विद्यार्थ्यांसाठी खऱ्या आनंदाचा आणि आरोग्यदायी ठरला.

अक्राणी प्रतिनिधी, जिल्हा परिषद शाळा, थेवापाणी (ता. तळोदा, जि. नंदुरबार )
शालेय पोषण आहार योजनेअंतर्गत पूरक आहार म्हणून ताज्या, टवटवीत स्ट्रॉबेरीचे वाटप करण्यात आले._

लहानग्या विद्यार्थ्यांच्या हातात जशा त्या लालचुटूक, रसाळ स्ट्रॉबेरी आल्या, तसतसे त्यांच्या चेहऱ्यावर उमटलेले निरागस हास्य, डोळ्यांतील चमक आणि मनमोकळा आनंद पाहून वातावरणच प्रसन्न झाले. त्या क्षणी केवळ फळांचे वाटप नव्हते, तर आनंद, आरोग्य आणि प्रेम यांचेही सुंदर वितरण घडत होते.

यावेळी शिक्षकांनी विद्यार्थ्यांना स्ट्रॉबेरीचे पौष्टिक महत्त्व समजावून सांगितले.शरीरासाठी आवश्यक असणारे जीवनसत्त्वे, ताजेपणा आणि रोगप्रतिकारक शक्ती वाढविण्यात स्ट्रॉबेरीचे योगदान याबद्दल मार्गदर्शन केले. तसेच, थंड हवामानात स्ट्रॉबेरीचे उत्पादन चांगले होते आणि आपल्या नंदुरबार जिल्ह्यातील तोरणमाळसारख्या थंड हवेच्या ठिकाणीही उत्कृष्ट दर्जाची स्ट्रॉबेरी पिकवली जाते, ही अभिमानाची बाब विद्यार्थ्यांना समजावून सांगितली.

हा छोटासा उपक्रम विद्यार्थ्यांच्या आरोग्यासोबतच त्यांच्या मनात निसर्ग, शेती आणि पोषणाबद्दल जागरूकता निर्माण करणारा ठरला. अशा उपक्रमांमुळे शिक्षणासोबतच जीवनमूल्यांचीही रुजवात होत असून, विद्यार्थ्यांच्या सर्वांगीण विकासासाठी हे पाऊल अत्यंत मोलाचे आहे असे मुख्याध्यापक चंद्रकांत सपकाळे यांचे मत आहे