कन्नड तालुका (प्रतिनिधी):
महाराष्ट्र शासनाच्या वतीने राबविण्यात येत असलेल्या ‘छत्रपती शिवाजी महाराज महाराजस्व अभियान’ अंतर्गत, कन्नड तहसील कार्यालयाद्वारे देवगाव रंगारी येथे शुक्रवारी (१० एप्रिल २०२६) भव्य ‘समाधान शिबीर’ आयोजित करण्यात आले होते. या शिबिरात एकाच छताखाली प्रशासकीय कामांचा निपटारा झाल्याने नागरिकांमध्ये समाधान व्यक्त होत आहे.
प्रमुख उपस्थिती:
या शिबिरास भाजप प्रदेश कार्यकारिणी सदस्य तथा जिल्हा परिषद सदस्य प्रा. डॉ. संजय गव्हाणे यांनी विशेष उपस्थिती लावून नागरिकांच्या समस्या जाणून घेतल्या. त्यांच्यासोबत कन्नडचे उपविभागीय अधिकारी (SDM) संतोष गोरड, तहसीलदार सारिका भगत, पंचायत समितीच्या उपसभापती माया सुरासे यांची प्रमुख उपस्थिती होती.
प्रशासकीय यंत्रणा सक्रिय:
शिबिरामध्ये महसूल आणि पंचायत समितीच्या विविध विभागांनी आपले स्टॉल्स लावले होते. यात खालील प्रमुख कामांचा लाभ देण्यात आला:
महसूल विभाग: जिवंत ७/१२ मोहीम अंतर्गत वारस फेरफार नोंदी, नावातील व फेर नंबरमधील दुरुस्त्या त्वरित करण्यात आल्या.
दाखले वितरण: विद्यार्थ्यांसाठी आवश्यक असलेले उत्पन्न, रहिवासी आणि जातीचे दाखले देण्याची प्रक्रिया राबवण्यात आली.
शिधापत्रिका: रेशन कार्डमधील बदल आणि नवीन कार्डांबाबत मार्गदर्शन करण्यात आले.
कल्याणकारी योजना: संजय गांधी निराधार योजना आणि श्रावणबाळ योजनेचे अर्ज स्वीकारण्यात आले. तसेच शेतकरी बांधवांसाठी Farmer ID आणि PM-KISAN योजनेची माहिती व नोंदणी करण्यात आली.
महिला व बालविकास: या विभागामार्फत राबविल्या जाणाऱ्या विविध शासकीय योजनांची माहिती गरजू महिलांपर्यंत पोहोचवण्यात आली.
मान्यवरांची उपस्थिती:
यावेळी सहाय्यक गट विकास अधिकारी पंडित साहेब, बालविकास प्रकल्प अधिकारी गिरी सर, परीक्षाविधीन SDM लता बागुल, आजबसिंग राजपूत, नारायण बोडखे यांच्यासह विविध विभागांचे अधिकारी, कर्मचारी आणि देवगाव रंगारी परिसरातील नागरिक मोठ्या संख्येने उपस्थित होते.
प्रशासकीय कामांसाठी नागरिकांना वारंवार कार्यालयात जावे लागू नये, या उद्देशाने आयोजित करण्यात आलेल्या या शिबिराचा देवगाव परिसरातील शेकडो ग्रामस्थांनी लाभ घेतला. तहसीलदार सारिका भगत यांनी महसूल विभागाच्या सर्व कामांचा आढावा घेऊन प्रलंबित प्रकरणे मार्गी लावण्याच्या सूचना दिल्या.
