धाराशिव : भाजपाच्या जनहिताच्या कामांवर विश्वास व्यक्त करत धाराशिव नगर परिषदेमधील काँग्रेस पक्षाचे गटनेते नगरसेवक सिद्धार्थ बनसोडे आणि नगरसेवक अक्षय जोगदंड यांनी भारतीय जनता पार्टीत जाहीर प्रवेश केला.
मुंबई येथे राज्याचे ग्रामीण विकास मंत्री जयकुमार गोरे यांच्या प्रमुख उपस्थितीत हा पक्षप्रवेश सोहळा पार पडला. या प्रवेशामुळे धाराशिव शहरातील भाजपची संघटनात्मक ताकद अधिक बळकट होणार असल्याचे मानले जात आहे.
यावेळी आमदार राणाजगजितसिंह पाटील यांनी नव्याने पक्षात दाखल झालेल्या नगरसेवकांचे स्वागत करून त्यांना पुढील राजकीय वाटचालीस शुभेच्छा दिल्या. त्यांच्या अनुभवाचा आणि कार्यक्षमतेचा उपयोग पक्ष संघटन मजबूत करण्यासाठी तसेच जनतेच्या हितासाठी निश्चितच होईल, असा विश्वास त्यांनी व्यक्त केला.
या प्रसंगी नगरसेवक अमित शिंदे, राहुल काकडे, अभिजित पतंगे यांच्यासह अनेक पदाधिकारी व कार्यकर्ते उपस्थित होते.
