(पालघर जिल्हा प्रतिनिधी श्री केविल पाटील)
बोईसर: तारापूर औद्योगिक पट्टयातील चित्रालय ओटला मार्केट परिसरात आज महाराष्ट्र औद्योगिक विकास महामंडळाच्या वतीने राबवण्यात आलेली अतिक्रमण विरोधी मोहीम कमालीची हिंसक आणि थरारक ठरली. प्रशासनाच्या नियोजनशून्य कारभाराचा फटका बसून दोन कामगार गंभीर जखमी झाले असून, संतप्त जमावापासून जीव वाचवण्यासाठी जेसीबी चालकाने वाहने उडवत पळ काढल्याने परिसरात युद्धसदृश परिस्थिती निर्माण झाली होती.
“जेसीबी चालकाचा थरार, वाहने उडवत काढला पळ : दोन कामगार गंभीर जखमी “
दिनांक ९ एप्रिल रोजी सकाळी ११ वाजल्यापासून एमआयडीसीचे अधिकारी अविनाश संखे यांच्या उपस्थितीत चित्रालय परिसरात जेसीबीच्या साहाय्याने अनधिकृत बांधकामे, लोखंडी शेड तोडण्याचे काम सुरू होते. कारवाई दरम्यान अनधिकृत टपरी चे बऱ्याच प्रमाणात नुकसान झाले आहे. मात्र यामुळे परिसरात भीतीचे वातावरण पसरले.
कारवाई पुढे सुरू असताना, काही व्यावसायिक आपली दुकाने आणि शेडमधील सामान स्वतःहून सुरक्षित बाहेर काढत होते. दोन कामगार लोखंडी शेडवर चढून पत्रे काढण्याचे काम करत असतानाच, जेसीबी चालकाने कोणत्याही पूर्वसूचनेशिवाय शेडवर पंजा मारला. यामुळे संपूर्ण शेड कोसळून दोन्ही कामगार उंचावरून खाली फेकले गेले. या अपघातात त्यांच्या डोक्यांना गंभीर दुखापत होऊन मोठ्या प्रमाणावर रक्तस्त्राव झाला.
हे दृश्य पाहताच तेथील कामगार आणि व्यावसायिकांचा संयम सुटला आणि त्यांनी जेसीबी चालकाच्या दिशेने धाव घेतल्याचे पाहून घाबरलेल्या जेसीबी चालकाने पळ काढण्याचा प्रयत्न केला. यावेळी मागे-पुढे न पाहता जेसीबी वेगाने दवडल्यामुळे उभ्या असलेल्या असलेल्या एका टाटा इलेक्ट्रिक कारला आणि आयसर टेम्पोला जोरदार धडक बसली. कार चालकाचा जीव थोडक्यात वाचला असला तरी वाहनांचे प्रचंड नुकसान झाले आहे.
सदर कारवाई बाबत कोणतीही पूर्वसूचना न दिल्याचा स्थानिकांचा आरोप आहे.
सध्या या प्रकरणाची नोंद बोईसर पोलीस ठाण्यात करण्यात आली असून, पोलिसांनी वेळीच घटनास्थळी येऊन परिस्थिती नियंत्रात ठेवली. जखमी कामगारांवर उपचार सुरू असून, तसेच अतिक्रमण निष्क्षित करणार का व दोषींवर काय कारवाई होते, याकडे सर्वांचे लक्ष लागले आहे.
