अर्धापूर, ता. १० (बातमीदार)
भारतीय राज्यघटनेचे शिल्पकार डॉ. बाबासाहेब आंबेडकर यांच्या जयंतीनिमित्त अर्धापूर शहरात विविध सामाजिक, शैक्षणिक व सांस्कृतिक कार्यक्रमांचे भव्य आयोजन करण्यात आले आहे. जयंती मंडळाचे अध्यक्ष उमाकांत (उमेशभाऊ) सोनाजी सरोदे यांनी याबाबत माहिती दिली.
या कार्यक्रमांची सुरुवात शहरातील प्रज्ञा बौद्ध विहार येथे शनिवार (ता. ११) रोजी सकाळी ९ वाजता होणार असून, क्रांतीसूर्य महात्मा ज्योतिराव फुले व डॉ. बाबासाहेब आंबेडकर यांच्या पुतळ्यांना पुष्प अर्पण करून अभिवादन करण्यात येणार आहे.
त्यानंतर मंगळवार (ता. १४) रोजी सकाळी ९ वाजता पंचशील ध्वजाचे ध्वजारोहण करण्यात येणार असून गौतम बुद्ध व डॉ. आंबेडकर यांच्या प्रतिमांना पुष्प, धूप व दीप अर्पण करून त्रिशरण पंचशील ग्रहणाचा कार्यक्रम पार पडणार आहे.
शनिवार (ता. १८) रोजी “महामानवास अभिवादन” या उपक्रमांतर्गत सकाळी ६ ते रात्री १२ या वेळेत १८ तासांच्या अभ्यास उपक्रमाचे आयोजन करण्यात आले आहे. विद्यार्थ्यांनी या उपक्रमात सहभागी होऊन अभ्यासाच्या माध्यमातून अभिवादन करावे, असे आवाहन आयोजकांनी केले आहे.
तसेच २६ एप्रिल रोजी सकाळी ९ वाजता पंचशील ध्वजवंदन, बुद्ध व आंबेडकर यांच्या प्रतिमांचे पूजन, त्रिशरण पंचशील ग्रहण व प्रमुख वक्त्यांचे मार्गदर्शन होणार आहे. त्यानंतर शहरातील प्रमुख मार्गांवरून डॉ. आंबेडकर यांच्या प्रतिमेची भव्य मिरवणूक काढण्यात येणार असून सांस्कृतिक कार्यक्रमांचीही रेलचेल असणार आहे.
दरम्यान, १ मे रोजी बुद्ध पौर्णिमा व बुद्ध जयंतीनिमित्त सकाळी ९ वाजता पंचशील ध्वजारोहण, पूजन व त्रिशरण पंचशील कार्यक्रम आयोजित करण्यात आला आहे. दुपारी बसवेश्वर चौक ते तामसा कॉर्नर या मार्गावरून भगवान बुद्ध यांच्या प्रतिमेची भव्य मिरवणूक काढण्यात येणार असून प्रज्ञा बौद्ध विहार येथे कार्यक्रमाची सांगता होईल. यावेळी दुपारी १२ ते ४ या वेळेत महाप्रसादाची व्यवस्था करण्यात आली आहे.
या सर्व कार्यक्रमांमध्ये अर्धापूर शहर व परिसरातील नागरिकांनी मोठ्या संख्येने सहभागी व्हावे, असे आवाहन जयंती मंडळाच्या वतीने करण्यात आले आहे.
